Kamandujučy armijaj Niderłandaŭ nazvaŭ «bliskučaj» apieracyju pad Kurskam i raskazaŭ pra dazvoł bić pa Rasii
Kamandujučy ŭzbrojenymi siłami Niderłandaŭ Ona Ejchielschajm (Onno Eichelsheim) u intervju NOS (Nederlandse Omroep Stichting — Niderłandskaja radyjoviaščalnaja karparacyja) zajaviŭ, što Ukraina moža vykarystoŭvać niderłandskija źniščalniki F-16 u vajennych metach na terytoryi Rasii.
«My nie ŭvodzili nijakich abmiežavańniaŭ na vykarystańnie i dalokaść dziejańnia F-16, pakul dziejničajuć zakony vajennaha času. (…) Ukraina moža vykarystoŭvać resursy, jakija my dajom, jak jana choča, pry ŭmovie zachavańnia normaŭ humanitarnaha prava»,
— skazaŭ Ejchielschajm i dadaŭ, što amierykancy padčas jaho vizitu ŭ ZŠA byli «častkova zhodnyja z hetym».
«U ich jość inšyja abmiežavańni, ale jany taksama nadali inšyja sistemy ŭzbrajeńnia. U kožnym razie, u nas adna meta — zabiaśpiečyć pieramohu Ukrainy ŭ vajnie. Ja dumaju, što my prykładajem usie namahańni dla dasiahnieńnia hetaj mety», — zajaviŭ kamandujučy ŭzbrojenymi siłami Niderłandaŭ.
Ejchielschajm taksama adznačyŭ, što ličyć ukrainskuju apieracyju ŭ Kurskaj vobłaści Rasii «bliskučaj u praktyčnym płanie», jakaja źjaŭlajecca «jak minimum pačatkam mahčymaha stratehičnaha karektavańnia zmahańnia pamiž Rasijaj i Ukrainaj».
«Jany davoli chutka zaniali vialikuju terytoryju z vykarystańniem novych technałohij. Takim čynam, jany stvaryli pierad Pucinym dylemu. Ukraina pavinna dziejničać inakš, čym u apošnija pieryjady, tamu što ciapier heta statyčny front. Tamu ja vielmi dobra razumieju z vajennaha apieratyŭnaha punktu hledžańnia, čamu Ukraina sprabuje dziejničać takim čynam», — skazaŭ vajskoviec.
Viadoma, što Amsterdam pieradaść Kijevu 24 źniščalniki F-16, adnak u intervju NOS Ejchielschajm nie ŭdakładniŭ, kolki ź ich užo razhornuta va Ukrainie.
Kamientary