Viosku ŭ Biełaviežskaj puščy naviedaŭ vielmi redki žuk. Što za jon i čym admietny?

U samoj Biełaviežskaj puščy chapaje miescaŭ, u jakich hety vid moža žyć — heta i vysokaŭzrostavyja dubrovy, i prosta staryja duby dy lipy ŭ puščanskich vioskach. Jon tut sustrakajecca navat u starych duplistych pładovych drevach. Adnak samoha žuka možna ŭbačyć niačasta, pakolki jon viadzie vielmi zatojeny ład žyćcia, za što i atrymaŭ svaju nazvu.

Pustelnik — adzin z najbolšych žukoŭ u Jeŭropie. Pamiery darosłaha žuka pieravyšajuć 3 sm, a ličynki — bolš za 7 sm. u cełym heta dosyć redki ŭ Jeŭropie pradstaŭnik siamiejstva płaścinčatavusych žukoŭ, da jakich taksama adnosiacca i ŭsim viadomyja chruščy, branzoŭki i hnajeviki.

Hety vid nie tolki zaniesieny ŭ Čyrvonuju knihu Respubliki Biełaruś, ale taksama achoŭvajecca ŭ mnohich inšych krainach Jeŭropy. Žuki i ličynki žyvuć u dupłach bujnych liścievych dreŭ. Ichniaja redkaść źviazanaja z tym, što ludzi časta vysiakajuć staryja duplistyja drevy.

Akramia taho, hetyja žuki dosyć marudlivyja i słaba pieramiaščajucca, nie vielmi addalajučysia ad rodnych dreŭ, choć časam i lotajuć ciopłymi viečarami. Tolki kala 15% žukoŭ pakidajuć baćkoŭskaje dreva, na jakim jany raźvivalisia.

Samcy viaduć bolš utojeny ład žyćcia, tamu na adkrytym pavietry možna čaściej sustreć samak. U hetych žukoŭ, u adroźnieńnie ad mnohich inšych nasiakomych, samki šukajuć samcoŭ, a nie naadvarot.

Samcy vyłučajuć mocna pachki fieramon dla pryciahnieńnia samak. Adnym ludziam jaho pach nahadvaje suničny ci abrykosavy vodar, inšym — pach skury, a niekatoryja naohuł ličać jaho niepryjemnym. Ale adno možna adznačyć dakładna: navat čałaviek zdolny jaho ŭłoŭlivać na adlehłaści da 30 mietraŭ. A samki pačujuć značna dalej.

Pa pachu šukać pustelnikaŭ navučylisia i ich vorahi, naprykład, ščaŭkun iržava-čyrvony (Elater ferrugineus). Jahonyja ličynki siłkujucca ličynkami pustelnikaŭ. Ličynki žyvuć u truchlavych drevach. Jany siłkujucca parachnioj i hrybnicami, jakija na joj raźvivajucca. Žyvym drevam jany nie škodziać. Pry hetym, abmiažoŭvajučy raźvićcio hryboŭ, jany, naadvarot, zapavolvajuć rost dupła. Darosłyja asobiny praktyčna nie charčujucca.

Žukoŭ možna sustreć na adkrytym pavietry z maja pa vierasień, adnak čaściej za ŭsio ŭ siaredzinie leta.

Ličynki raźvivajucca 3-4 hady, a darosłyja žuki žyvuć značna mienš: samcy — usiaho 2-3 tydni, samki da 3 miesiacaŭ. Ich asnoŭnaja funkcyja — heta razmnažeńnie i raśsialeńnie, a ŭ ličynak — rost i nabor pažyŭnych zapasaŭ dla darosłaj stadyi.

Biełaviežskaja pušča — asnoŭny jeŭrapiejski reziervat žyvych arhanizmaŭ, źviazanych sa starymi drevami i miortvaj draŭninaj. U joj znajšli prytułak dziasiatki vidaŭ, jakija stali redkimi abo źnikli ŭ raŭninnaj Jeŭropie.

• 7
• 0
• 0
• 0
• 0
• 1
• 2
• 0