U bresckim ofisie «Viasny» stajała špijonskaja videakamiera. Što viadoma z čarhovaha pasiadžeńnia pa spravie arhanizacyi
U piatnicu na pasiadžeńni pa spravie «Viasny» praciahvali dapytvać śviedak i začytvać ich pakazańni. Ale asabista dać pakazańni na sudzie zmahli adzinki: bolšaść śviedak znachodzicca za miažoj. A ŭ piatnicu na sudzie vyśvietliŭsia jašče šerah pryčyn, pa jakich śviedki nie mohuć źjavicca na sudovy praces. Padrabiaznaści paviedamlajuć pravaabaroncy.
13 studzienia asabista na sudzie byŭ dapytany śviedka z Homiela, jakomu dapamahaŭ kiraŭnik homielskaj filii «Viasny» Leanid Sudalenka, asudžany da troch hadoŭ kałonii pavodle č. 2 art. 342 Kryminalnaha kodeksa («Finansavańnie hrupavych dziejańniaŭ, jakija hruba parušajuć hramadski paradak»).
Śviedka z Homiela zajaviŭ, što nie viedaje abvinavačanych, i naohuł byŭ ździŭleny, što jaho vyklikali pa hetaj spravie ŭ jakaści śviedki. Na pasiadžeńni jaho dapytvali pra toje, čym jamu dapamahaŭ Sudalenka, jaki ŭžo adbyvaje termin u viciebskaj kałonii.
Astatnija śviedki, jakija byli taksama vyklikanyja na 13 studzienia, u sud nie źjavilisia.
Jany dasłali zajavy ab razhladzie spravy bieź ich prysutnaści. U asnoŭnym jany spasyłalisia na adsutnaść srodkaŭ, kab pryjechać, na najaŭnaść niepaŭnaletnich dziaciej, na stan zdaroŭja. Ale advakaty pravaabaroncaŭ vystupili suprać začytvańnia pakazańniaŭ, bo zajaŭlenyja pryčyny nie źjaŭlajucca vyklučnymi, kab śviedki mahli nie prysutničać na pasiadžeńni. Abaroncy viasnoŭcaŭ zaŭvažyli, što zajavy napisanyja jak pad kapirku, i dziŭna, što va ŭsich niama hrošaj, choć usie jany ŭ Biełarusi. Dakumientaŭ, jakija paćviardžajuć drennaje samaadčuvańnie, śviedki nie pradjavili.
Advakatka zaŭvažyła, što heta pazbaŭlaje abvinavačanych prava na abaronu, bo ŭ ich niama mahčymaści zadać dadatkovyja pytańni. Jašče adna advakatka źviarnuła ŭvahu na toje, što śviedak na sud možna dastavić i prymusova. Ale, niahledziačy na piarečańni advakataŭ, sud pryznaŭ uvažlivymi pryčyny niajaŭki śviedak i vyrašyŭ začytać ich pakazańni, dadzienyja padčas śledstva.
Aleś Bialacki, jaki jašče na pieršym pasiadžeńni zajaŭlaŭ, što jon nie paśpieŭ aznajomicca z bolš čym 70 tamami materyjałaŭ kryminalnaj spravy (na vyvučeńnie 283 tamoŭ spravy pa 300 staronak byŭ adviedzieny ŭsiaho miesiac), siońnia paprasiŭ dziaržaŭnaha abvinavaŭcu začytvać pakazańni śviedak jak maha bolš padrabiazna. A Valancin Stefanovič zapatrabavaŭ začytać dva dakumienty ź pieršaha toma, jakija śviedčać ab tym, što na abvinavačanych mocna cisnuli ŭ SIZA. Taksama Valancin zajaviŭ, što dokazy źbirali ŭ abvinavačanych z parušeńniami, što taksama paćviardžajuć hetyja dakumienty. Valancin Stefanovič dadaŭ, što «ŭsie viedajuć, čym u nas u krainie zajmajecca HUBAZiK».
Na sudzie 13 studzienia ŭ asnoŭnym začytvali pakazańni śviedak z Bresta, jakija tyčylisia dziejnaści bresckaj filii «Viasny». Dniami ŭžo byli začytanyja pakazańni Marharyty Vialičkinaj z Bresta.
Z materyjałaŭ spravy stała viadoma, što ŭ ofisie bresckaj «Viasny» była ŭstalavana videakamiera i ažyćciaŭlałasia apieratyŭnaja videazdymka. Śviedkam padčas śledstva demanstravali ŭ tym liku raśpiski i kadry videazapisaŭ z hukam, na jakich jany musili apaznać siabie.
Pravaabaroncaŭ pa-raniejšamu praciahvajuć utrymlivać u sudzie ŭ kajdankach. Kanvairy začyniajuć padčas sudovych pasiadžeńniaŭ dźviery na kluč znutry. Valancin zajaviŭ, što padčas pracesu ich nie kormiać. Pravaabaronca adznačyŭ, što sudździa pavinna dumać pra charčavańnie abvinavačanych i nie pryznačać sudovyja pasiadžeńni zanadta časta.
Kamientary