«U kamfortnych umovach». Urad raskazaŭ, jak budzie raspłačvacca pa daŭhach
«Biez šoku» i «ŭ kamfortnych umovach» — tak Biełaruś u hetym hodzie budzie vypłačvać dziarždoŭh. Na jaho absłuhoŭvańnie ŭ respublikanskim biudžecie vydzielena kala 4 młrd biełaruskich rubloŭ. Pra heta pieršy namieśnik ministra finansaŭ Dźmitryj Kijko raspavioŭ u efiry telekanała STB, piša Office life.
Pa jaho słovach, kala 75% sumy prypadaje na dastupnyja nam valuty «siabroŭskich» krain: rasijski rubiel i kitajski juań.
Z pahašeńniem asnoŭnaha doŭhu jość pytańni z-za sankcyj u dačynieńni da Nacyjanalnaha banka — płaciežnaha ahienta ŭrada. Tamu ź minułaha hoda vyrašana vypłačvać sumy ŭ biełaruskich rublach.
Tak, u lutym treba budzie pahašać jeŭraablihacyi na sumu kala $800 młn. Ale vypłaty inviestary atrymajuć u biełaruskaj nacyjanalnaj valucie i tolki ŭ tym vypadku, kali «zmohuć paćvierdzić, što mienavita jany źjaŭlajucca ŭładalnikami jeŭraablihacyj».
Resursy na heta praduhledžanyja, hety płaciež my projdziem biez usialakaha šoku», — zajaviŭ Kijko.
Jon dadaŭ, što ź inšymi kredytorami, siarod jakich asnoŭnyja — Rasija i jeŭrazijskija finansavyja instytuty, sfarmiravany svaje miechanizmy pracy.
«Płanujem pahašać płaciažy pa tych hrafikach, jakija ŭ nas jość. Tym nie mienš viadziom pieramovy, kab hetyja płaciažy ažyćciaŭlalisia ŭ kamfortnych dla nas umovach. I našy partniory nas čujuć, praca idzie kanstruktyŭna», — skazaŭ Kijko.
Kamientary