Sud pa spravie «zmoŭščykaŭ» zakryli: pakazańni daje ŭkaraniony ŭ hrupu siłavik
Siońnia ŭ sudzie pa spravie tak zvanych «zmoŭščykaŭ» daje pakazańni asnoŭny śviedka — padpałkoŭnik Ivan Žuraŭski. Prakuror zajaviŭ chadajnictva, kab ukaranionaha ŭ šerahi «zmoŭščykaŭ» siłavika, padpałkoŭnika Hienieralnaha štaba Uzbrojenych sił Biełarusi, dapytali za začynienymi dźviaryma, paviedamlaje Sputnik.
Žuraŭski braŭ udzieł u šerahu zum-kanfierencyj. Taksama jon znachodziŭsia padčas sustrečy abvinavačanych Alaksandra Fiaduty, Juryja Ziankoviča ŭ maskoŭskim restaranie «Taras Bulba», paśla čaho ich zatrymali.
U sudzie ŭžo dapytanaja pieravažnaja bolšaść śviedkaŭ, ale nie zjaviŭsia ŭ sud, a nakiravaŭ apaviaščeńnie supracoŭnik MNS, jaki paznajomiŭ Ziankoviča ź siłavikom Žuraŭskim.
Siarod śviedak, jakija davali pakazańni ŭ sudzie, jak minimum troje znachodziacca pad śledstvam pa inšych kryminalnych spravach — suzasnavalnik pryznanaha ŭ Biełarusi ekstremisckim TH-kanała NEXTA Raman Pratasievič (jon znachodzicca pad chatnim aryštam). Jašče dvaich lidaraŭ niezaležnych prafsajuzaŭ, Alaksandra Jarašuka i Siarhieja Antusieviča, dla dačy pakazańniaŭ u sud dastavili pad kanvojem ź SIZA, jany prachodziać pa inšaj kryminalnaj spravie.
Kryminalnuju spravu ab sprobie dziaržaŭnaha pieravarotu ŭ Biełarusi Minski abłasny sud pačaŭ razhladać 29 lipienia.
Pa spravie prachodziać Juryj Ziankovič, Alaksandr Fiaduta, Ryhor Kastusioŭ, jakija abvinavačvajucca ŭ zmovie, ździejśnienaj z metaj zachopu dziaržaŭnaj ułady niekanstytucyjnym šlacham (č. 1 art. 357 KK), i jašče dva fihuranty — Volha Hałubovič i Dzianis Kraŭčuk — abvinavačvajucca ŭ aktyŭnym udziele ŭ hrupavych dziejańniach, jakija hruba parušajuć hramadski paradak (č. 1 art. 342 KK).
Akramia hetaha, Ziankoviču inkryminavany stvareńnie ekstremisckaha farmavańnia i kiraŭnictva takim farmavańniem (č. 1 art. 361-1 KK), zakliki da zachopu dziaržaŭnaj ułady (č. 3 art. 361 KK), raspalvańnie sacyjalnaj varožaści, učynienaje hrupaj asob (č. 3 artykuła 130 KK).
Ciapier čytajuć
Staŭ viadomy prysud eks-pamočniku Łukašenki Iharu Bryło4
Kamientary