«200 čałaviek u liście čakańnia». Architekturnaja studyja jašče nie darabiła stylovyja domiki na Brasłavach, a tudy ŭžo čarha — raskazvajem, što za ažyjataž
«Naša meta — papularyzacyja pryrody Biełarusi», — natchniona kaža architektar i suzasnavalnik biuro Zrobim architects Andruś Biezdar. Jašče ŭ dziacinstvie jon zakachaŭsia ŭ Brasłaŭskija aziory i vyrašyŭ adkryć ich pryhažość inšym. Praŭda, tak, kab nazirać jaje možna było sa stylovaha, utulnaha domika. Tak u kampanii «Zrobim» źjaviŭsia jašče adzin kirunak dziejnaści: z modulnymi damami ŭ rajskich kutočkach, dzie možna adpačyć ad haradskoj mituśni.
Błoh «1906» daviedaŭsia, kolki budzie kaštavać taki adpačynak i kali jaho možna budzie acanić. My pieradrukoŭvajem hety materyjał.
Biuro Zrobim architects užo bolš za siem hod zajmajecca modulnymi damami, ale sioleta jany vyrašyli nie tolki rabić ich na zamovu kankretym siemjam, ale i zdavać u arendu.
«Chaciełasia, kab ludzi mahli pažyć u dobraj architektury, chaj i niekalki dzion. Pry hetym natchniajučysia navakollem Biełarusi. Mnie pryjemna, što možna takim čynam raźvivać unutrany turyzm, kab my jašče bolš vandravali pa svajoj krainie», — kaža Andruś Biezdar.
U Biełarusi isnuje farmat kiempinhaŭ u pryhožych miescach, ale celnyja novyja, mabilnyja damy ŭ sučasnym pračytańni, z ułasnymi maleńkimi saunami ŭ turystyčnych kropkach da Zrobim architects nichto nie budavaŭ.
«Pry hetym za miažoj taki farmat dosyć raspaŭsiudžany. Mikradamy budujuć u pryhožych miescach — u harach, lesie ci na bierazie voziera, i jany nabirajuć papularnaść. Samy blizki aryjencir — niamiecki prajekt Raus haus. U ich jość damy, naprykład, u jabłynievym sadzie», — raskazvaje Andruś.
Raspačać zabudovu vyrašyli kala Brasłaŭskich azioraŭ: Andruś pravioŭ tam dziacinstva.
«U školnyja hady baćki zakidvali mianie tudy da dziaduli na try miesiacy, tam ja baviŭ letni čas. Ja palubiŭ hety kraj, jon pryhožy, aziorny. Tam prajšoŭ ladnik i pakinuŭ šmat źviazanych pamiž saboj azioraŭ na aktyŭnym reljefie. I dla mianie Biełaruś — heta ŭ pieršuju čarhu Brasłaŭskija aziory. Hetkaje miesca mocy».
Tyzier modulnych damoŭ na Brasłaŭskich
Architektar viedaŭ, što znajści miesca pad zabudovu na Brasłavach zvyčajna sprava nie ź lohkich. Niekatoryja hublajuć na pošuki dva-try hady. Ale Andrusiu pašancavała, i svoj hiektar jon nabyŭ niedzie praz 1,5 miesiaca pošukaŭ.
Usiaho ŭ hetaj łakacyi płanujecca pastavić vosiem domikaŭ. Jany nie buduć stajać adzin na adnym, kab zabiaśpiečvać pryvatnaść haściej i kab nie sapsavać hałoŭnuju ideju i zvyšmetu: dazvolić čałavieku pravieści čas u dyjałohu z pryrodaj.
Pieršyja dva nievialikija damy na 16 m² źjaviacca ŭ siaredzinie lipienia. I ŭ list čakańnia, kab zasialicca tudy, zapisałasia ŭžo 200 čałaviek (pry hetym nijakaj rekłamy pakul nie zapuskałasia, pieršyja patencyjnyja naviedniki pryjšli ź instahrama architektara).
«200 čałaviek — heta vielmi šmat dla dvuch domikaŭ. U Brasłavie, u pryncypie, arendny siezon usiaho 4-5 miesiacaŭ. Užo pałovu ź ich viadziecca naša budaŭnictva. Dva miesiacy pryblizna zastajecca — heta 120 dzion dla dvuch domikaŭ, a zajavak užo bolš. Heta śviedčyć pra toje, što prajekt cikavy ludziam, i što my možam adčyniać inšyja domiki. Mienavita tamu my zamovili na vytvorčaści novyja dva. I dalej za imi pojduć inšyja, kab usim chapała miesca dla adpačynku.
Nastupnyja damy, darečy, buduć bolšymi pa płoščy: užo 35 kvadratnych mietraŭ, z dvuma pakojami. Farmat nie dla šumnych tusovak, chutčej dla ludziej, jakija siarod tydnia ci ŭ vychodnyja chočuć źbiehčy na Brasłaŭskija, pabyć la voziera, pakatacca na rovarach, papłavać na łodcy».
Łožki ŭ damach buduć stajać la samaha akna
Što tyčycca cen, to płanavanaja suma za sutki — kala 65 dalaraŭ za domiki biez łaźni i 75 dalaraŭ ź joj.
Na Brasłavach kamanda «Zrobim» spyniacca nie źbirajecca.
«My ŭžo razhladajem miesca ŭ Nalibockaj puščy, kala eka-ściežki. Tam my źbirajemsia krychu inšym sposabam stavić damy, bo terytoryja nie praduhledžvaje zabudovu, jak u Brasłavie, jana vydajecca pad fiermierskija nadzieły. I ŭ pryncypie my płanujem zajmacca hetym biznesam razam ź fiermieram. Pakul, akurat, vyrašajem usie jurydyčnyja pytańni nakont ziamli i ŭzajemaadnosin — nas i fiermierskaj haspadarki.
Ja ŭ pryncypie dumaŭ, kali nie budu mocna zaležyć ad hrošaj, to mnie b było i dalej cikava budavać u roznych miescach Biełarusi stylovyja domiki. I paśla stvaryć mapu ź imi — kab ludzi mahli vandravać z domika ŭ domik, natchniajučysia roznymi miescami našaj krainy», — dzielicca marami Andruś.
Čytajcie taksama:
Chitraja schiema z chatnim telefonam, pietardy, kałhas: topavyja historyi, chto jak zarabiŭ pieršyja ŭ žyćci hrošy
Ad 55 rubloŭ za dzień. Kolki kaštuje adpačyć u samych rejtynhavych sanatoryjach Biełarusi
Daktary nie vieryli, što hety minčuk budzie chadzić paśla komy, a jon staŭ dyrektaram sałona pryhažości, jaki naviedvajuć Bahinskaja i Sieviaryniec
Chto takaja Alesia Parchomienka z Kipra, jakaja raźviazała biełaruska-biełaruskuju vajnu88
Chto takaja Alesia Parchomienka z Kipra, jakaja raźviazała biełaruska-biełaruskuju vajnu
«Doktarka», advakat, čałaviek z kamieraj i niekalki dužych chłopcaŭ. U Pietrapaŭłaŭskaj Barščahoŭcy rasijskija śpiecsłužby skarystalisia śpiecyfičnym ukrainskim biznesam vajennaha času1515
Kamientary