«Vaźmicie Łatviju». Nasamreč, lišniaja śmiarotnaść ad kavidu ŭ Łatvii ŭ piać razoŭ mienšaja, čym u Biełarusi
«Ciapier, hladzicie, rot zakryła ŭsia daśviedčanaja Jeŭropa: nijakaj infarmacyi, usio «dobra». Ale tam ža katastrofa. Vaźmicie Łatviju: krychu bolš za miljon nasielnictva — situacyja ŭ sto razoŭ horšaja, čym u Biełarusi. Cišynia», — skazaŭ Alaksandr Łukašenka na naradzie pa baraćbie z kavidam 19 kastryčnika, na jakoj jon abrynuŭsia na ministraŭ Pinieviča i Kubrakova za ŭviadzieńnie abaviazkovaha masačnaha režymu ŭ hramadskich miescach.
Adrazu varta ŭdakładnić, što nasielnictva Łatvii składaje nie «bolš za miljon», a amal 2 miljony čałaviek.
Nakont «u sto razoŭ». Z 13 kastryčnika ŭ Łatvii štodnia fiksujuć bolš za 2000 vypadkaŭ kavidu. U Biełarusi ź jaje ŭ piać razoŭ bolšym nasielnictvam — aficyjna stolki ž vypadkaŭ za sutki.
Ale, u adroźnieńnie ad Łatvii, dzie ŭsia statystyka adkrytaja, u Biełarusi statystyka pa rajonach i haradach zakrytyja, tamu niemahčyma pravieryć ahulnanacyjanalnuju statystyku šlacham supastaŭleńnia rajonnych.
I — treba nahadać — kab źbić chvalu zaražeńniaŭ, Łatvija na čatyry tydni ŭvodzić strohi łakdaŭn, nie ličačysia ź finansavymi stratami, kab ratavać žyćci ludziej.
Łatvija na 4 tydni ŭvodzić žorstki łakdaŭn
Pieršyja chvali karanavirusa Łatvija prajšła našmat lepš, čym Biełaruś. «Lišniaja śmiarotnaść» u Łatvii ŭ pieršyja 12 pandemičnych miesiacaŭ skłała ŭsiaho kala 5 pracentaŭ ad zvyčajnaha ŭzroŭniu. Heta bolš, čym u Narviehii, Finlandyi, Danii, dzie «lišniaja śmiarotnaść» była ŭ ramkach statystyčnaj chibnaści. Ale heta ŭ čatyry-piać razoŭ mienš, čym u Polščy, Čechii i Litvie, dzie pieršym dźvium chvalam kavidu dali rady našmat horš.
U krainach Jeŭrasajuza ŭsia statystyka adkrytaja, i možna paraŭnoŭvać roznyja krainy i navat rehijony. U Biełarusi ad 2020 hoda statystyka śmiarotnaści zakrytaja. Viadomyja tolki danyja pa asobnych rajonach, dzie advažnyja miedyki ci statystyki dali ich u ŚMI.
Viadomyja taksama źviestki pa śmiarotnaści za 2020 hod, zdabytyja chakierami. Viadomyja taksama źviestki za druhi kvartał, pieradadzienyja Biełaruśsiu ŭ AAN. Z materyjałaŭ MUS vynikaje, što z sakavika 2020 hoda da sakavika 2021 hoda zališniaja śmiarotnaść u krainie skłała 32 tysiačy čałaviek.
Heta aznačaje, što «lišniaja śmiarotnaść» u Biełarusi vyrasła na 26 pracentaŭ. Heta ŭ 5 razoŭ horš, čym u Łatvii.
32 tysiačy śmierciaŭ — heta nasamreč strašnyja ličby: kavid tolki za pieršyja 12 miesiacaŭ zabraŭ žyćci 0,35 pracenta žycharoŭ Biełarusi. Miž tym ciapierašniaja chvala, miarkujučy pa ŭsim, horšaja za papiarednija.
«Nikudy ich adciahvać nie treba, typu biehać pa horadzie i hladzieć, ci nadzieli maski abo nie nadzieli, — heta taksama nie vaša sprava, nie adciahvajciesia na heta», — zajaviŭ Alaksandr Łukašenka na adras miedykaŭ.
Nasamreč, u Biełarusi miedyki i biez taho nie praviarajuć masačny režym za miežami svaich ustanoŭ.
Najbolš žorstka masačny režym vykonvajecca nie ŭ krainach Zachadu, a ŭ Kitai, Sinhapury i inšych krainach Azii. Tam padčas karancinnych pieryjadaŭ za nievykanańnie masačnaha režymu ludziej karajuć, a ludziej biez masak prosta nie puskajuć u hramadskija miescy. Usio tamu, što miedyki i navukoŭcy pryjšli da vysnovy, što našeńnie masak zapavolvaje raspaŭsiud virusaŭ.
Kamientary