«Sprabujuć naciahnuć savu na hłobus». «Zmoŭščyki» prakamientavali abmierkavańnie «pieravarotu»
U siužecie ANT pakazali siem čałaviek, jakija nibyta płanavali zamach na Alaksandra Łukašenku i členaŭ jaho siamji, a taksama pieravarot. Niekatoryja ź ich prakamientavali zapisy anłajn-kanfierencyj, prademanstravanyja ŭ efiry.
Były siłavik Pavieł Kułažanka, jaki žyvie ŭ Ńju-Jorku, raspavioŭ Tut.by, što ŭ efiry było niekalki frahmientaŭ z roznych anłajn-sustreč.
— Heta byŭ adkryty dyskusijny kłub, jaki źbiraŭsia sa studzienia miesiaca. Skład udzielnikaŭ kanfierencyj taksama źmianiaŭsia. Kanfierencyi rassyłalisia vielmi mnohim ludziam. Na našaj dyskusijnaj placoŭcy abmiarkoŭvałasia ŭsio toje, što abmiarkoŭvajecca na kuchniach kožny viečar u luboj biełaruskaj siamji: jak paskoryć sychod Łukašenki, — rastłumačyŭ Kułažanka.
Jon padkreślivaje, što dyskusii tearetykaŭ ničoha supolnaha z padrychtoŭkaj i płanavańniem zabojstvaŭ i pieravarotaŭ nie majuć.
— Choć ciapier praŭładnyja ŚMI sprabujuć choć niejak «naciahnuć savu na hłobus» i apraŭdać vykradańnie ŭ Rasii dvaich hramadzian Biełarusi i dastaŭku ich u Minsk, kudy jany ŭ bližejšy čas nie źbiralisia, — dadaŭ «zmoŭščyk».
Z nahody padačy ŭryŭkaŭ z anłajn-dyskusij u siužecie dziaržtelebačańnia Pavieł Kułažanka vykazaŭsia vielmi łakanična: «Ni słova praŭdy».
— Tam mnohija frazy vyrazanyja z kantekstu, kab pradstavić infarmacyju ŭ śviatle, vyhadnym uładam.
«Usio možna abmierkavać. A voś atrymać hrošy i zajmacca płanavańniem — zusim inšaje»
Jašče adzin z «siamiorki», navukoviec Alaksandr Pierapiečka, jaki taksama pražyvaje ŭ ZŠA, u kamientary Radyjo Svaboda adznačyŭ, što ździŭleny tym faktam, što razmovy pamiž im i jaho kalehami pa Zoom stali padstavaj dla hučnych zajaŭ ab teraryźmie. Pavodle jaho słoŭ, takija rehularnyja videapieramovy viaducca ŭžo amal paŭhoda. Jon taksama dadaŭ, što ŭryŭki niekatorych z hetych dyskusij publikujucca na sajcie geostrategy.info.
Pierapiečka padkreśliŭ, što padčas anłajn-dyskusij vialisia dyskusii ab usich mahčymych i niemahčymych varyjantach scenara pieraadoleńnia hłybokaha palityčnaha kryzisu ŭ Biełarusi. Na pytańnie, ci abmiarkoŭvałasia tema pieravarotu ŭ Biełarusi padčas takich anłajn-kanfierencyj, Alaksandr Pierapiečka adkazaŭ śćviardžalna.
— Dziaržaŭny pieravarot — hałoŭny sposab pazbavicca kryvavaj dyktatury. Ale paŭtaraju: usio možna abmierkavać. A voś atrymać hrošy i zajmacca płanavańniem — zusim inšaje, — padkreślivaje navukoviec.
«Sprava zmoŭščykaŭ»
Nahadajem, 17 krasavika Alaksandr Łukašenka zajaviŭ, što palitołah Alaksandr Fiaduta, kiraŭnik partyi BNF Ryhor Kastusioŭ i Juryj Ziankovič byli datyčnyja da płanavańnia zamachu na jaho i jaho synoŭ. Jon taksama zajaviŭ, što za padrychtoŭkaj zamachu stajali śpiecsłužby i kiraŭnictva ZŠA.
Kiraŭnik KDB Biełarusi Ivan Cierciel u efiry telekanała ANT paviedamiŭ, što Fiaduta, Ziankovič i Kastusioŭ znachodzilisia ŭ złačynnaj hrupie, udzielniki jakoj raspracavali i pačali realizoŭvać płan «pa fizičnaj likvidacyi Prezidenta Respubliki Biełaruś i členaŭ jaho siamji, arhanizacyi ŭzbrojenaha buntu z metaj zachopu ŭłady hvałtoŭnym šlacham». U efiry pakazali frahmienty razmovy Alaksandra Fiaduty i inšych «zmoŭščykaŭ» — Dźmitryja Ščyhielskaha, Ihara Makara, Ryhora Kastusiova, Alaksandra Pierapiečki i Paŭła Kułažanki ŭ anłajn-kanfierencyi. U efiry taksama zajavili, što «pieravarot zmoŭščyki namiecili na leta hetaha hoda, červień ci lipień».
FSB Rasii paćvierdziła infarmacyju KDB Biełarusi i zajaviła, što ŭdzielničała ŭ apieracyi zatrymańnia Fiaduty i Ziankoviča ŭ Maskvie. Pavodle infarmacyi FSB, jany prybyli ŭ horad paśla kansultacyj u ZŠA i Polščy, kab sustrecca z «apazicyjna nastrojenymi hienierałami Uzbrojenych Sił Biełarusi». Pry hetym, jak śćviardžaje FSB, hvałtoŭnaja źmiena ŭłady ŭ Biełarusi płanavałasia na 9 maja.
Kamientary