«Na katałcy vaziŭ supracoŭnik RUUSa». Źbity pry zatrymańni akcior filma «Kupała» ź pierałomam lažyć u balnicy
Illa Jasinski — akcior Respublikanskaha teatra biełaruskaj dramaturhii i vykanaŭca roli Vacłava Łastoŭskaha ŭ filmie «Kupała». Paśla zatrymańnia 15 listapada źbity akcior trapiŭ u balnicu chutkaj dapamohi. Jon raskazaŭ «Našaj Nivie», što adbyłosia.
Illu zatrymali ŭ Minsku dniom. Spačatku źbivali ŭ busie, paśla ŭ aŭtazaku. Čamu da jaho było takoje žorstkaje staŭleńnie, mužčyna nie viedaje. «Biełaruskaja łatareja», — žartuje.
U Maskoŭskaje RUUS jaho pryvieźli niedzie a 15-j hadzinie.
«Nas tam było čałaviek 60. Źbitych niašmat, niekalki čałaviek. Mnie pačała baleć pajaśnica. Ja ledź chadziŭ, milicyjanty trymali pad ruku», — padzialiŭsia akcior.
Jon paprasiŭ vyklikać chutkuju. U adździaleńni milicyi prabyŭ z hadziny dźvie. Kaža, supracoŭniki tam byli stomlenyja biaskoncym składańniem pratakołaŭ.
«Kali vy pierastaniecie ŭžo chadzić?» — pytalisia ŭ zatrymanych.
Na chutkaj Illu zabrali razam ź inšym mužčynam. Usiu darohu ich supravadžaŭ kanvoj.
«Na katałcy mianie vaziŭ supracoŭnik RUUSa. Kazaŭ, što my ź im jak u filmie «1+1», tolki travoj nie padzielicca», — zhadvaje Illa.
Pierałomy adrostkaŭ dvuch pazvankoŭ — taki dyjahnaz pastavili daktary. Najbližejšyja 5-7 dzion Illa praviadzie ŭ balnicy. Zrastacca pierałomy buduć paŭtara-dva miesiacy, uvieś hety čas taksama budzie patrebny pakoj.
«Jašče ŭ mianie siniuščyja nohi pryhožyja, jak farbaj pamalavanyja», — iranizuje Illa.
Najbližejšy śpiektakl u RTBD — «Karjera doktara Rausa» — projdzie bieź jaho.
«Kažuć, na maim miescy budzie pusty invalidny vazok. Kalehi prynamsi abmiarkoŭvali takuju ideju, spytali, jak ja staŭlusia. Ja skazaŭ, što budu padtrymlivać luboje vykazvańnie».
Illa trymajecca badziora.
«Možacie złamać chrybcinu, ale duch nie złamajecie», — kaža jon.
Čytajcie taksama: «Kali tvajho kalehu pakalečyli, heta soram — vychodzić na scenu». Akciory RTBD raskazali pra svajo zvalnieńnie
Ciapier čytajuć
Biełarusaŭ pa viartańni damoŭ na miažy ŭsio čaściej raździavajuć dahała1
Biełarusaŭ pa viartańni damoŭ na miažy ŭsio čaściej raździavajuć dahała
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2525
Kamientary