Namieśnica ministra achovy zdaroŭja nie viedaje, čamu z aficyjnaha partała pra COVID-19 iznoŭ źnikła statystyka pa rehijonach
Namieśnica ministra achovy zdaroŭja Alena Bohdan nie viedaje, čamu z nacyjanalnaha partała pra COVID-19 źnikła statystyka pa rehijonach.
9 krasavika na nacyjanalnym partale była apublikavanaja infarmacyja pra kolkaść chvorych pa abłaściach. Siońnia hetaja infahrafika źnikła.
Namieśnica ministra na pytańnie žurnalista adkazała ŭźvinčana: «Prabačcie, ja nie viedaju, čamu prybrali infarmacyju z sajta StopCOVID. Prabačcie, ja nie daju infarmacyju na sajt StopCOVID».
Mahčyma, statystyku na dadzieny partał daje nie Ministerstva achovy zdaroŭja, a štab pry Administracyi prezidenta, choć na hałoŭnaj staroncy partała staić łoha Ministerstva achovy zdaroŭja.
8 krasavika Minzdaroŭja paviedamlała pra 3 chvorych na karanavirus u Bresckaj vobłaści. U toj ža dzień abłasnaja sanstancyja paviedamlała pra 28 vypadkaŭ i dała ich raźmierkavańnie pa rajonach.
Praź dzień, 9 krasavika, staršynia Bresckaha abłvykankama Anatol Lis zajaviŭ, što ŭ vobłaści karanavirus paćvierdžany ŭ 41 čałavieka, i taksama apisaŭ ich raźmierkavańnie pa rajonach. U toj ža dzień partał Minzdaroŭja StopCOVID paviedamlaŭ, što ŭ Bresckaj vobłaści špitalizavanyja 17 čałaviek.
Razychodžańnie statystyki miascovaj i partała StopCOVID Minzdaroŭja nazirałasia i pa inšych rehijonach, dzie svaju statystyku ahučvali miascovyja orhany — u Mahiloŭskaj, Hrodzienskaj abłaściach. Urešcie, 10 krasavika StopCOVID źniaŭ infarmacyju pa rehijonach.
Žurnalisty vykazvali zdahadki, što dadzienaja infarmacyja z rehijonaŭ sistematyzujecca ŭ Minsku sa spaźnieńniem na niekalki dzion, ale hetamu niama paćviardžeńnia.
Brescki abłasny centr hihijeny i epidemijałohii apublikavaŭ statystyku 8 krasavika — mienavita tuju, jakaja razyšłasia sa źviestkami Minzdaroŭja ŭ 9 razoŭ. Paśla hetaha jon bolš jaje nie publikavaŭ.
Minski abłasny centr hihijeny i epidemijałohii publikuje statystyku zaražanych VIČ-infiekcyjaj, dadzienych pra COVID-infiekcyju nie daje.
Viciebski abłasny centr hihijeny i epidemijałohii statystyki nie daje, abmiažoŭvajecca infahrafikaj ab praviłach hihijeny.
Hrodzienski abłasny centr hihijeny i epidemijałohii publikuje statystyku pra chvorych i pamierłych ad COVID pa Kitai i inšych krainach, ale nie daje statystyki pa svaim rehijonie.
Minzdaroŭja pačało rehularna davać svaje źviestki pra kolkaść chvorych i pamierłych ad COVID z 2 krasavika, paśla rezkaj krytyki na jaho adras z boku hramadskaści za adsutnaść jasnaj statystyki. Źviestki pa rehijonach pry hetym publikujucca nierehularna. Va ŭsich inšych jeŭrapiejskich krainach hetyja źviestki publikujucca rehularna i nie składajuć tajamnicy.
Kamientary