Praviadzieńnie vybaraŭ u Biełarusi pad pahrozaj

Kruhły stoł u ambasadzie ZŠA z udziełam Džordža Kroła raspačaŭsia z žorstkaj zajavy pasła z nahody šerahu skandalnych zajavaŭ pradstaŭnikoŭ ułady i telekanałaŭ na adras uradu ZŠA i supracoŭnikaŭ amerykanskaj ambasady.

Pavodle słovaŭ amerykanskaha pasła, «amal štodzionna dziaržaŭnyja medyi zajaŭlajuć, što Złučanyja Štaty nibyta žadajuć destabilizavać sytuacyju ŭ Biełarusi, raspalić tut revalucyju i padparadkavać amerykanskaj «imperskaj voli». Inšyja pradstaŭniki ŭradu robiać zajavy pra toje, što ZŠA nibyta raspracavali plan destabilizacyi Biełarusi ažno da intervencyi.

«U toj ža čas dziaržaŭnyja medyi malujuć amerykanskich dyplamataŭ jak złaviesnych špijonaŭ. Hetaja standartnaja chitramudraja kanstrukcyja skažeńniaŭ i chłuśni časoŭ chałodnaj vajny. Maja kraina adkryta vystupaje za svabodnyja i spraviadlivyja vybary ŭ Biełarusi, volnyja ŚMI, svabodu ad prymusu, zapałochvańnia i pahrozaŭ na adras hramadzianaŭ ci arhanizacyjaŭ, jakija imknucca mirna ŭdzielničać u palityčnym žyćci nacyi».

Sp. Kroł padkreśliŭ, što ZŠA j nadalej buduć niaŭchilnym i aktyŭnym faktaram pa padtrymcy svabodnaha vybaru biełaruskaha narodu. «Heta pravieranaje časam, śviadomaje abaviazacielstva ZŠA», — skazaŭ jon. Heta aznačaje, što dačynieńni aficyjnaha Miensku j Vašynhtonu pierad vybarami buduć tolki ŭskładniacca. Prajšoŭ hod z taho času, jak Złučanyja Štaty pryniali Akt ab demakratyi ŭ Biełarusi. Jak paviedamiŭ pasoł Kroł, kroki j rašeńni ŭradu ZŠA, źviazanyja z hetym zakonam, znachodziacca zaraz na stadyi aktyŭnaha razhledžańnia va ŭradzie. Rychtujecca, naprykład, infarmacyja pra rachunki j majomaść pradstaŭnikoŭ biełaruskaha kiraŭnictva.

ZŠA, słovami Kroła, budzie spryjać niezaležnamu infarmavańniu biełaruskaha hramadztva j niezaležnamu nazirańniu za vybarami, što ŭłady Biełarusi zadavolić nijak nia moža. Bolš za toje, Kroł adkryta kaža, što «praviadzieńnie vybaraŭ u Biełarusi znachodzicca pad pahrozaj, i my pavinny pralić śviatło ŭvahi na heta razam z Eŭraźviazam». «My praciahniem svaju pracu niezaležna ad umovaŭ i sytuacyi», — adznačyŭ ambasadar, žartoŭna dadaŭšy, što jon — veteran chałodnaj vajny.

Sp. Kroł patłumačyŭ žurnalistam sytuacyju ź niavydačaj amerykanskaj vizy Mikałaju Čarhincu, jaki musiŭ lacieć u Ameryku pa linii AAN. Jon paviedamiŭ, što Čarhiniec padčas papiaredniaha znachodžańnia ŭ ZŠA zajmaŭsia dziejnaściu, jakaja znachodziłasia pa-za miežami dazvolenaj vizaj, i razhlad jaho nastupnaj zajaŭki zapatrabavaŭ bolš času. «Ale MZS Biełarusi zabrała zajaŭku na atrymańnie Čarhincom vizy da taho, jak u nas była mahčymaść skončyć apracoŭku hetaj zajaŭki», — skazaŭ Dž.Kroł.

Źmicier Dryhajła

• 0
• 0
• 0
• 0
• 0
• 0
• 0
• 0