Vyjšaŭ na svabodu 18‑hadovy błohier, jakoha sudzili za machinacyi z hrašyma, sabranymi na lačeńnie Vani Ściacenki

Michaiła Drahuna z turmy čakali 38‑hadovaja kachanaja Jaŭhienija Tarasienka i dačka Ahata, jakoj usiaho miesiac.

Jaŭhienija Tarasienka, Michaił Drahun i ich dačka Ahata. Tut i dalej skrynšoty ź instahrama Jaŭhienii

38‑hadovaja błohierka Jaŭhienija Tarasienka apublikavała ŭ instahramie videa z podpisam: «Dačakałasia… Kolki my zasłuhoŭvajem łajkaŭ?». Na videa 18‑hadovy Michaił, jaki paśpieŭ stać baćkam, pakul znachodziŭsia za kratami, trymaje na rukach miesiačnuju dačku Ahatu i całuje kachanuju.

Jaŭhienija padzialiłasia ŭ błohu, što chłopiec zrabiŭ joj siurpryz svaim źjaŭleńniem. Jana čakała Michaiła 8 vieraśnia, a jaho vypuścili ŭčora. Błohier pryjechaŭ u sušeryju Soy, jakaja naležyć Jaŭhienii, i paprasiŭ piersanał terminova jaje vyklikać.

U vyniku błohierka atrymała ad svaich supracoŭnic paviedamleńnie, što zdaryłasia niešta žudasnaje i jana terminova patrebnaja. Jaŭhienija pryniesłasia na miesca praz 10 chvilin i pabačyła Drahuna.

Nahadajem: Michaił Drahun i Jaŭhienija Tarasienka — papularnyja ŭ Hrodnie błohiery. U 2024 hodzie para navat paŭdzielničała ŭ praŭładnym realici-šou «Fabryka błohieraŭ».

Ale mnohija pra ich daviedalisia paśla hučnaha skandału z dabračynnym zboram.

Zhodna z aficyjnaj infarmacyjaj, razam sa svajoj kachanaj Michaił prapanoŭvaŭ padpisčykam za 10 rubloŭ udzielničać u rozyhryšy, dzie hałoŭnymi pryzami byli smartfony ci aŭtamabil. Arhanizatary zajaŭlali, što tolki nievialikaja častka hrošaj pojdzie na pryzy, a ŭsiu astatniuju sumu addaduć na lačeńnie chłopčyka. Źbirali hrošy dla vaśmihadovaha Vani Ściacenki, u jakoha ciažkaja hienietyčnaja chvaroba — mijadystrafija Dziušena. Nieabchodny chłopcu ŭkoł kaštavaŭ 2,9 miljona dalaraŭ.

Ahułam błohierami było sabrana 1,5 miljona rubloŭ. Ale mamie chvoraha dziciaci jany pieradali tolki 200 tysiač rubloŭ, 315 tysiač vydatkavali na pryzy dla ŭdzielnikaŭ strymu. Astatniaje puścili na šykoŭnaje žyćcio.

Michaił trapiŭ za kraty, jašče kali jamu było 17.

Sioleta ŭ lipieni jaho sudzili. Drahuna pryznali vinavatym u pryčynieńni majomasnaj škody šlacham padmanu i złoŭžyvańnia davieram, a taksama ŭ paklopie. Akramia taho, kala 130 tysiač rubloŭ, jakija sud pryznaŭ dachodam ad złačynstva, kanfiskavanyja ŭ dachod dziaržavy.

Michaiłu dali adzin hod i šeść miesiacaŭ pazbaŭleńnia voli.

U SIZA Drahun znachodziŭsia ź siaredziny śniežnia 2025 hoda, a pakolki dla niepaŭnaletnich dzień u SIZA zaličvajecca za dva, to vyjści jon zmoh značna raniej.

Jaŭhienija raniej raspaviadała ŭ błohu, što dzicia jany płanavali zahadzia, pryčym inicyjataram byŭ mienavita Michaił. 

Tak atrymałasia, što ŭ chutkim časie paśla taho, jak para daviedałasia pra ciažarnaść, Michaił trapiŭ za kraty. U listach ź SIZA jon prasiŭ kachanuju nie rabić abort. 

Imia Ahata dla dački prydumaŭ małady baćka. Dla maci taksama było važna, kab dzicia nasiła proźvišča Drahun.

Imavierna, u chutkim časie Michaił vierniecca da błohierstva. Jaŭhienija ŭžo napisała, što chłopiec budzie dzialicca historyjami ŭ svaim telehram-kanale.

Kamientary da artykuła