Što ź nieruchomaściu ŭ prapahandysta Ryhora Azaronka?

Ryhor Azaronak — supracoŭnik dziaržkanała STB i samy adyjozny biełaruski televiadoŭca. Vydańnie «Lusterka» vyvučyła pracoŭnuju bijahrafiju prapahandysta i infarmacyju pra jaho nieruchomaść. Zdajecca, pakul jaho «vyklučnaja starannaść» nie adbiłasia na materyjalnym stanoviščy.

Ryhor Azaronak. Fota: sb.by

Siamiejnaje hniazdo

Pavodle infarmacyi krynic «Lusterka», va ŭłasnaści Ryhora nie tak šmat nieruchomaści. Na jaho zarehistravanaja tolki adna tracina trochpakajovaj kvatery ŭ minskaj Malinaŭcy na adrasie Słabodskaja, 117. Jaje ahulnaja płošča — 63,4 kvadratnaha mietra.

Dźviuma tracinami ŭ hetaj kvatery pieršapačatkova vałodali taksama baćka i maci prapahandysta. Baćka Ryhora — eks-prapahandyst i čynoŭnik Kiraŭnictva spraŭ Łukašenki Juryj Azaronak — pamior u lutym 2025 hoda.

Paśla śmierci Azaronka-starejšaha była adkrytaja spadčynnaja sprava, pra pravy zajavili spadčyńniki. Imavierna, trochpakajoŭka dahetul u pracesie pieraafarmleńnia, bo niekalki dzielaŭ pakul ni na kaho nie aformlenyja, a niabožčyk Juryj pavodle papier zastajecca ŭładalnikam nievialikaj jaje častki.

Šmatpaviarchovik na vulicy Słabodskaj, kvateraj u jakoj sumiesna vałodali Ryhor z baćkami. Fota: wikimapia.org

Ipateka na 40 hadoŭ

Cikava, što na hetuju kvateru aformlenaja ipateka. Jaje ŭziali jašče ŭ 2016 hodzie, tady suma skłała kala 374 miljonaŭ biełaruskich rubloŭ da denaminacyi (ekvivalent prykładna 19 tysiač dalaraŭ pavodle aktualnaha na toj momant kursu).

Ipateka aformlenaja na 40 hadoŭ i dahetul nie vypłačanaja. Da poŭnaj vypłaty koštu kvatery ŭłaśniki nie majuć prava jaje pradać.

Pravaŭładalnikam ipateki paznačanaja administracyja Maskoŭskaha rajona Minska. Toj fakt, što kredyt afarmlali haradskija ŭłady, a nie bank, moža śviedčyć, što była vykarystanaja adna sa schiem ilhotnaha kredytavańnia. Adnak što kankretna stała padstavaj dla takoha kredytu — nieviadoma.

Žyŭ z baćkami da 27 hadoŭ

Ryhoru ciapier 30 hadoŭ. Jon zastajecca prapisany ŭ baćkoŭskaj kvatery, adnak, vidać, nie žyvie tam. U intervju rasijskaj žurnalistcy Ksienii Sabčak Ryhor raskazvaŭ, što žyŭ z baćkami da 27 hadoŭ, bo hrošaj na arendnuju kvateru ŭ jaho nie było. Atrymaŭsia taki dyjałoh:

— Nu i ich (hrošaj. — Zaŭv. red.) nie było. Na arendnuju kvateru, — tłumačyŭ Azaronak.

— A na telekampanii vam nie płacili dastatkova? — pacikaviłasia Sabčak.

— Nie, nu zarobak płacili, ale… Na toj momant było niedastatkova, tak.

— To-bok u vas niejkaja asablivaja suviaź z baćkami?

— Dy va ŭsich, vidać, musić być niejkaja asablivaja suviaź z baćkami. Biezumoŭna.

— Nie, nu čamu vy tak… Nie, ja ž prosta pra vas — mnie ščyra cikava. I hetyja pytańni — jany biez padkołu. Prosta mnie praŭda cikava: vy darosły čałaviek…

— Nu, ja navat nie dumaŭ pra heta. Nie było nahody. Nie razvažaŭ pra niejkija suviazi — asabliva, nie asabliva i hetak dalej. Prosta žyŭ, i ŭsio.

Rajon u ahraharadku Ždanovičy, dzie, imavierna, žyŭ Ryhor Azaronak u 2022 hodzie. Vyjava: yandex.by

Miarkujučy sa źviestak vycieku, u 2022 hodzie Ryhor paznačaŭ u jakaści svajho adrasu ŭžo nie baćkoŭski dom, a inšaje miesca — šmatpaviarchovik na vulicy Parkavaj u ahraharadku Ždanovičy pad Minskam.

Kim jašče jon pracavaŭ?

Zhodna z aŭtabijahrafijaj prapahandysta, jakuju «Lusterka» atrymała z dapamohaj arhanizacyi Belpol, svoj pracoŭny šlach Azaronak pačynaŭ davoli ścipła. Z 2011 hoda — jašče školnikam i studentam — paśpieŭ papracavać dvornikam, padsobnym rabočym i vartaŭnikom.

U 2016‑m Ryhor uładkavaŭsia piedahoham-arhanizataram u 145‑iu siaredniuju škołu Minska. U 2017 hodzie jon atrymaŭ dypłom u Biełaruskaj dziaržaŭnaj akademii mastactvaŭ pa śpiecyjalnaści «režysura kino i telebačańnia» i pajšoŭ na telekanał STB.

Ryhor Azaronak padčas zdymak siužetu pra žnivo dla telekanała STB. Minskaja vobłaść, žnivień 2017 hoda. Foto: vk.com

U 2018 hodzie karjeru daviałosia pierapynić dziela terminovaj vajskovaj słužby. Paśla vojska viarnuŭsia na toj ža kanał, ale ŭžo ŭ jakaści «palityčnaha ahladalnika».

Paźniej, u 2022 hodzie, Ryhor atrymaŭ druhuju vyšejšuju adukacyju: skončyŭ Akademiju kiravańnia pry Administracyi Łukašenki pa śpiecyjalnaści «dziaržaŭnaje kiravańnie i ideałohija». U 2023/2024 navučalnym hodzie jon pačaŭ vieści lekcyi i sieminary pa «asnovach miedyjabiznesu» ŭ Połackim dziaržuniviersitecie. Ciapier imia Azaronka niama ŭ raskładach zaniatkaŭ VNU, ale ŭ jaho tielehram-kanale jon zhadvaŭsia jak zaprošany śpikier.

Pavodle źviestak, raniej atrymanych «Lusterkam» z dapamohaj «Kibierpartyzan», na hetym jaho aktyŭnaści nie zakančvajucca. U 2022−2023 hadach jon fihuravaŭ u śpisach «Biełaj Rusi» (u bijahrafii jon adznačaŭ, što ŭvachodziŭ u jaje «najvyšejšy palitsaviet»). A ŭ 2024 hodzie taksama supracoŭničaŭ ź dziaržahienctvam «Minsk-Naviny» i homielskim filijałam Biełaruskaha tavarystva «Znanije».

Na momant składańnia aŭtabijahrafii — u 2023 hodzie — Ryhor adznačaŭ, što nie žanaty.

Asobna jon zhadvaŭ, što padčas vykanańnia słužbovych abaviazkaŭ «demanstruje vyklučnuju starannaść, maje vysokuju stupień arhanizavanaści, moža pravilna raźmiarkoŭvać čas i mahčymaści dla vykanańnia zadańnia». Sam siabie jon charaktaryzavaŭ jak «maralna ŭstojlivaha i adkaznaha» śpiecyjalista.

Kamientary da artykuła