U Čarnobyli znajšli niezvyčajny čorny hryb, jaki siłkujecca radyjacyjaj

U Čarnobylskaj zonie adčužeńnia navukoŭcy znajšli niezvyčajny mikraarhanizm — čorny hryb Cladosporium sphaerospermum. Jon nie tolki vyžyvaje pry vysokim uzroŭni radyjacyi, ale i raście dziakujučy joj chutčej, piša vydańnie Science Alert.

Cladosporium sphaerospermum. Fota: Science Alert

Hryb byŭ znojdzieny niepasredna na kanstrukcyjach razburanaha 4‑ha enierhabłoka Čarnobylskaj AES. Analiz pakazaŭ, što hety vid vałodaje ŭnikalnaj zdolnaściu vykarystoŭvać enierhiju ijanizujučaha vypramieńvańnia dla padtrymańnia rostu i mietabalizmu.

Navukoŭcy ličać, što klučavuju rolu tut adyhryvaje miełanin — ciomny pihmient u ścienkach kletak. Miarkujecca, što miełanin pracuje jak «bijałahičnaja soniečnaja batareja»: pahłynaje radyjacyju i pieratvaraje jaje ŭ chimičnuju enierhiju, jakuju hryb moža vykarystoŭvać dla žyćcia.

Choć dakładny miechanizm tak zvanaha «radyjosintezu» jašče patrabuje paćviardžeńnia, łabaratornyja ekśpierymienty pakazvajuć adnaznačna: radyjacyja nie tolki nie škodzić hetamu hrybu, a jakraz naadvarot — paskaraje jaho rost. Heta stavić pad sumnieŭ tradycyjny pohlad, što ijanizujučaje vypramieńvańnie zaŭsiody źniščalna dziejničaje na žyvyja arhanizmy.

Pieršyja ciomnyja kałonii takich hryboŭ zaŭvažyli jašče ŭ kancy 1990‑ch hadoŭ na ścienkach sarkafaha razburanaha reaktara. Ich vyklučnaja ŭstojlivaść da doz radyjacyi, śmiarotnych dla bolšaści formaŭ žyćcia, vyklikała vialikuju cikavaść navukoŭcaŭ.

Daśledavańni pakazali padvyšanuju kancentracyju miełaninu ŭ hetych arhanizmach i ich zdolnaść vydatna adčuvać siabie ŭ ekstremalnych umovach, jakija raniej ličylisia nieprydatnymi dla isnavańnia mikraarhanizmaŭ.

Kamientary da artykuła