Расія дапаможа Беларусі ў сферы ракетнай вытворчасці, адпаведныя дамоўленасці дасягнутыя на найвышэйшым узроўні, заявіў на нарадзе па пытанні дзяржабаронзаказу Аляксандр Лукашэнка.
«Як ідзе распрацоўка перспектыўных узораў узбраення, перш за ўсё ракетнага? Я прэм'ер-міністру ставіў адпаведную задачу пасля апошняй сустрэчы на Далёкім Усходзе з прэзідэнтам Расіі. Мы ж ствараем новую ракету. Ракету вельмі эфектыўную ўзору «Іскандэр» прыкладна. І поўная была падтрымка», — заявіў Лукашэнка.
«Пры мне прэзідэнт паставіў задачу Дзмітрыю Рагозіну неадкладна аказаць падтрымку, каб мы не стваралі веласіпед, каб мы маглі задзейнічаць вопыт распрацоўшчыкаў, ракетчыкаў Расійскай Федэрацыі, якія рабілі «Іскандэр». Гэта маладыя хлопцы», — дадаў ён.
«Іскандэр» — расійскія аператыўна-тактычныя ракетныя комплексы. Распрацаваны навукова-вытворчай карпарацыяй «Канструктарскае бюро машынабудавання» ў горадзе Каломне Маскоўскай вобласці. Асноўнае прызначэнне ракетных комплексаў «Іскандэр» — знішчэнне сістэм СПА і СРА саперніка, а таксама найважнейшых аб'ектаў, якія прыкрываюцца імі, на далечыні да 500 км.
Каментары