Лукашэнка аб пераразмеркаванні паўнамоцтваў: Не трэба імгненна, агулам прымаць усё
Аляксандр Лукашэнка сабраў 30 сакавіка нараду па пытаннях пераразмеркавання паўнамоцтваў паміж органамі дзяржаўнай улады. Пра гэта паведамляе яго прэс-служба.
Ён растлумачыў, чаму рашэнне вялізнага пласта пытанняў было замкнёнае на ім.
— Гэта было зроблена для таго, каб навесці парадак у працы з бюджэтам, зберагчы дзяржаўную маёмасць, нетры, усё тое, што належыць (і я спадзяюся, будзе належаць) беларускаму народу. Не дапусціць алігархіі, абвальнай прыватызацыі і расслаення грамадства, выбудаваць ключавыя інстытуты ўлады — адзначыў Лукашэнка.
Вывучыць магчымасць пераразмеркавання ўзмацнення паўнамоцтваў і адказнасці паміж рознымі органамі або галінамі ўлады Лукашэнка даручаў яшчэ ў мінулым годзе. Савет Міністраў, мясцовыя органы ўлады і парламентарыі падрыхтавалі пакет прапаноў, якія могуць пашырыць сферу дзейнасці ўрада і іншых дзяржорганаў.
— Я іх уважліва вывучаў. І мая першая прапанова — не трэба імгненна, агулам усё прымаць. Гэта павінен быць эвалюцыйны працэс. Частка рашэнняў сапраўды наспела сёння. Па іншых прапановах размываць паўнамоцтвы кіраўніка дзяржавы мы не будзем, — заявіў Аляксандр Лукашэнка.
— Гэта датычыцца ў першую чаргу тых сфер, дзе вырашаюцца найважнейшыя пытанні для любога жыхара, суб'екта гаспадарання і дзяржавы ў цэлым. Больш таго, часта яны носяць незваротны характар.
Перш за ўсё, па яго словах, гаворка ідзе аб зямельных адносінах, а дакладней — пытаннях распараджэння зямлёй.
— Тут маё жалезнае патрабаванне: на землі сельгаспрызначэння або ляснога фонду прэтэндаваць можна толькі па асобным рашэнні прэзідэнта. Тым больш, як мне дакладваюць, у рэгіёнах ёсць тысячы ўчасткаў, якія не запатрабаваныя. А тыя, хто маюць патрэбу ў паляпшэнні жыллёвых умоў, наогул могуць атрымліваць іх бясплатна, — сказаў Аляксандр Лукашэнка. — Але пад Мінскам і абласнымі цэнтрамі, паблізу вадаёмаў і запаведных месцаў зямля застанецца пад самым жорсткім кантролем. Вы ведаеце чаму: гэта агульны здабытак.
— Па іншых момантах мы актыўна абмяркуем кожны блок пытанняў, заслухаем абгрунтаванні для прыняцця канчатковых рашэнняў, — дадаў Аляксандр Лукашэнка.
Ён адзначыў, што пераразмеркаванне паўнамоцтваў адбываецца нячаста, таму трэба ўзважыць усе за і супраць па кожным пункце.
— Што хвалюе перш за ўсё? Ці гатовыя тыя, хто хоча дадатковых паўнамоцтваў, да іх рэалізацыі? Бо гэта не толькі дадатковае права аператыўна і гнутка вырашаць пытанні, але і нагрузка, дадатковая адказнасць. Адказнасць — ключавы аспект! — заявіў Аляксандр Лукашэнка.
Каментары