У судзе Цэнтральнага раёна Мінска 28 кастрычніка вынеслі прысуд па гучным ДТЗ: у красавіку даішнік паспрабаваў затрымаць матацыкліста, а той — выпадкова ці не — паехаў. У выніку міліцыянт правёў у коме 1,5 месяца, а кіроўца матацыкла чакаў прысуду ў СІЗА.
фота Ірыны Арахоўскай
У выніку 31-гадовага матацыкліста Сяргея Шаўцова прызналі вінаватым у супраціўленні супрацоўніку міліцыі і парушэнні ПДР асобай, якая кіравала транспартным сродкам, што пацягнула па неасцярожнасці прычыненне цяжкага цялеснага пашкоджання.
Суддзя Валерый Есьман вырашыў, што матацыкліст атрымае 5 гадоў пазбаўлення волі ў калоніі агульнага рэжыму, плюс — будзе пазбаўлены права кіраваць транспартнымі сродкамі на 5 гадоў.
Пацярпелы інспектар Уладзімер Таўпінец прасіў суд, каб байкер сплаціў яшчэ 50 тысяч рублёў маральнай шкоды. Гэты пазоў суддзя Есьман задаволіў часткова — даішнік атрымае 30 тысяч.
Само ДТЗ адбылося 18 красавіка. На рагу праспекта Незалежнасці і праспекта Машэрава супрацоўнік ДАІ падышоў да байкера на спартовым матацыкле, які стаяў на светлафоры, і запатрабаваў паказаць дакументы. Нагодай стала адсутнасць на матацыкле рэгістрацыйных знакаў. Што адбылося далей, дакладна невядома. Відавочцы казалі, што матацыкліст рэзка стартануў з месца, а інспектар схапіўся за руль. Міліцыя сцвярджае, што матацыкліст зачапіў інспектара і пацягнуў за сабой. Матацыкліст заяўляў, што даішнік рэзка схапіў яго за руку, і ён выпадкова націснуў на газ. Тым часам загарэлася зялёнае святло для аўтамабіляў, якія ехалі па праспекце Незалежнасці. Кіроўца аўтамабіля з інкасатарамі не бачыў матацыкліста з інспектарам і пачаў рухацца. Адбылося сутыкненне, у якім цяжка пацярпеў даішнік.
46-гадовы інспектар перанёс некалькі аперацый, у тым ліку і трэпанацыю чэрапа, паўтара месяца ён быў у коме.
Каментары