Сталічная міліцыя затрымала прадпрымальніка, які нібыта займаўся вырабам мэблі на заказ, а насамрэч проста падманваў кліентаў.
Як паведаміла прэс-служба ГУУС Мінгарвыканкама, 34-гадовы мінчук прыдумаў спосаб хутка зарабіць, нічога пры гэтым не робячы. Ён зарэгістраваўся як індывідуальны прадпрымальнік, арандаваў павільён на рынку ў Ждановічах і зарэгістраваўся там як вытворца корпуснай кухоннай мэблі. Прыцягваў ён кліентаў у першую чаргу тым, што цэны на паслугі былі на 200-300 даляраў ніжэйшыя, чым у іншых прадпрымальнікаў. Тлумачыў ён такую таннасць тым, што камплектавальнікі для кухняў заказвалі ў Расіі, а зборка адбывалася ў Беларусі.
Ахвотных замовіць недарагую мэблю знайшлося нямала. Мужчына браў перадаплату, якая складала 50%. На гэтым, уласна, яго праца і заканчвалася.
Для кліентаў у яго заўсёды знаходзіліся адгаворкі, чаму заказ не гатовы: або шмат іншых заказаў, або не паступілі камплектавальнікі і інш. Заказчыкі спачатку верылі і чакалі, а калі зразумелі, што далей чакаць бессэнсоўна, звярнуліся па дапамогу да праваахоўнікаў.
З заявамі ўжо звярнуліся 16 пацярпелых, якіх «прадпрымальнік» агулам падмануў больш чым на 400 мільёнаў беларускіх рублёў. У дачыненні да зламысніка Цэнтральным раённым аддзелам Следчага камітэта Рэспублікі Беларусь заведзеная крымінальная справа за махлярства.
Як мяркуюць супрацоўнікі праваахоўных органаў, ахвяр махляра можа быць значна больш.
Міліцыя просіць усіх, хто пацярпеў ад дзеянняў несумленнага прадпрымальніка, звяртацца па тэлефоне: 288-77-02 (следчы Максім Генадзевіч).
Каментары