Уладзіслава Баўмгертнера трымаюць у Мінску ў падабранай для яго кватэры. Ён знаходзіцца пад кругласутачным назіраннем аператыўнікаў.
Пра тое, што кіраўніка «Уралкалія» перавялі пад хатні арышт, паведамляе РІА «Новости» са спасылкай на яго расійскага адваката Аляксея Басістава. Да Баўмгертнера дапусцілі яго маці, якая напярэдадні прыляцела ў Мінск у надзеі на спатканні з сынам у СІЗА КДБ.
Паводле крыніц агенцтва «Інтэрфакс», Баўмгертнера вызвалілі на хадайніцтва генпракурора Расіі Юрыя Чайкі, які наведваў Мінск і правёў перамовы пра далейшы лёс справы «Уралкалія» са сваім беларускім калегам і вышэйшым кіраўніцтвам краіны.
Па выніках гэтых перамоваў было прынятае рашэнне пра супрацоўніцтва ў расследаванні гэтай крымінальнай справы, у тым ліку на падставе матэрыялаў беларускіх праваахоўных органаў. Беларускі бок палічыў магчымым змяніць меру стрымання Уладзіславу Баўмгертнеру на хатні арышт.
Аднак дзіўным чынам выхад бізнэсоўца з турмы супаў з інспекцыйным візітам Уладзіміра Пуціна на вучэнні «Захад-2013».
Нагадаем, што расійскага бізнэсмэна затрымалі ў канцы жніўня пасля спынення супрацоўніцтва «Уралкалія» з «Беларуськаліем». Пазней беларускія ўлады абвясцілі ў міжнародны вышук саўладальніка кампаніі Сулеймана Керымава.
Верагодна, на лёс Баўмгертнера паўплывалі рашэнні ў кіраўніцтве Беларусі і Расіі. Сёння ў Беларусь прыбывае расійскі прэзідэнт Уладзімір Пуцін. А прэм'ер-міністр Расіі Дзмітрый Мядзведзеў выказаў намер абмеркаваць лёс расійскага бізнэсоўца з кіраўніком беларускага ўрада Міхаілам Мясніковічам.
Цяпер чытаюць
Каля Сафіі ў Полацку паставілі помнік лётчыкам Нічыпарчыку і Куканенку. Але нават не самалёт той мадэлі, на якой яны загінулі, а аэраплан сталінскага часу2020
Каментары