U Kitai stvarajuć samuju mahutnuju kamieru nazirańnia, jakaja budzie raspaznavać tvary ludziej za 100 kiłamietraŭ
Kitajskija navukoŭcy raspracavali mahutnuju aerakaśmičnuju łaziernuju sistemu, zdolnuju detalova razhladać abjekty pamieram u milimietry na adlehłaści bolš za 100 kiłamietraŭ, što moža stać novym słovam u sučasnaj vyviedcy.
Raspracoŭka naležyć Navukova-daśledčamu instytutu aerakaśmičnaj infarmacyi Kitajskaj akademii navuk. Testy novaj sistemy ŭžo adbylisia na vysakahornym voziery Cinchaj, što na paŭnočnym zachadzie Kitaja, piša vydańnie South China Morning Post.
Umovy dla testaŭ byli idealnymi: vysokaja bačnaść, adsutnaść vobłakaŭ i stabilny viecier. Aptyčnaja sistema zmahła chutka i dakładna zafiksavać drobnyja detali pamieram usiaho 1,7 milimietra na adlehłaści 101,8 km.
Hetaja technałohija, jak śćviardžajuć kitajskija navukoŭcy, pa svaich mahčymaściach u 100 razoŭ pieraŭzychodzić usie sučasnyja špijonskija kamiery i teleskopy.
Sama kamiera vykarystoŭvaje śpiecyjalny łazier, jaki padśviatlaje abjekty i stvaraje ich detalovy malunak, padobna da taho, jak soniečnaje śviatło dapamahaje nam bačyć roznyja pradmiety. Hałoŭny sakret sistemy — asablivaja matryca z maleńkich linzaŭ (4×4), jakija razam pracujuć jak adna vielizarnaja linza. Heta dazvalaje bačyć vielmi drobnyja detali na vialikaj adlehłaści.
Vysokaja dakładnaść sistemy taksama stała mahčymaj dziakujučy pastajannaj madulacyi (źmieny častaty) łaziernaha promnia na častotach bolš za 10 HHc, a taksama prasunutym ałharytmam, što źnižajuć uzrovień aptyčnaha šumu ŭ 10 000 razoŭ. Navat pry słabym sihnale sistema stvaraje vyraznyja vyjavy, adznačaje South China Morning Post.
Takuju technałohiju možna vykarystoŭvać u vajennaj śfiery, naprykład, dla padrabiaznaha i biaśpiečnaha vyvučeńnia spadarožnikaŭ inšych dziaržaŭ — až da čytańnia sieryjnych numaroŭ. Aproč hetaha, sistema moža być vykarystana dla dakładnaha raspaznańnia tvaraŭ ludziej z arbity Ziamli ci bolš dbajnaha adsočvańnia siłaŭ praciŭnika padčas vajny.
Adnak u realnych umovach dasiahnieńnie zajaŭlenaj jakaści malunkaŭ moža być uskładniena atmaśfiernymi pieraškodami i składanaściu kanstrukcyi, pryznajuć kitajskija daśledčyki.
Aryštavali pradstaŭnikoŭ kampanii Bayer u Biełarusi15
Kamientary