Rasija ličyć padparadkavańnie Biełarusi svaim najbolšym źniešnieekanamičnym pośpiecham — źviestki z zakrytaha dakłada

Vydańnie Financial Times atrymała mahčymaść aznajomicca sa źmiestam zakrytaha dakłada, jaki byŭ pradstaŭleny na stratehičnaj siesii pa jeŭrazijskaj intehracyi pad kiraŭnictvam premjer-ministra Rasii Michaiła Mišuścina ŭ krasaviku minułaha hoda. Na sustrečy prysutničali niekalki dziasiatkaŭ vysokapastaŭlenych słužboŭcaŭ, top-mieniedžary samych bujnych rasijskich dziaržaŭnych kampanij, a taksama ideołahi impieryjalistyčnaha tołku Alaksandr Duhin i Siarhiej Karahanaŭ.

Jak vynikaje z dakłada, rasijskija aficyjnyja asoby ličać, što sankcyi Zachadu padryvajuć namahańni Maskvy pastavić pad svoj kantrol krainy byłoha SSSR, a taksama pieraškadžajuć naładžvańniu ekanamičnych suviaziaŭ z suśvietnym Poŭdniem.

U pryvatnaści, pryznajecca, što zachodni sankcyjny cisk, a taksama ekanamičnyja inicyjatyvy z boku Zachadu pryviali da addaleńnia ad Maskvy niekatorych ź jaje najbližejšych handlovych partnioraŭ.

Vykarystańnie Zachadam stratehii «bizuna i piernika» adnosna krain Centralnaj Azii prymušaje ich vykonvać sankcyi ŭzamien na dostup da suśvietnych rynkaŭ, transpartnych kalidoraŭ i łancužkoŭ pastavak u abychod Maskvy. U vyniku sajuźniki Rasii atrymali vyhadu ad sankcyj, vycieśniŭšy rasijskija pradpryjemstvy sa svajoj jurysdykcyi, uziaŭšy pad kantrol impartnyja i ekspartnyja patoki i vyvieŭšy vytvorčaści z Rasii.

U dakładzie adznačajecca, što meta Maskvy — adnavić svoj dostup da suśvietnaha handlu i kab Rasija pry hetym stała centram jeŭrazijskaha handlovaha błoka, jaki budzie imknucca kankuravać sa śfierami ekanamičnaha ŭpłyvu ZŠA, ES i Kitaja. Stvareńnie jeŭrazijskaha «makrarehijona» Maskva razhladaje jak važny doŭhaterminovy prajekt, jaki Maskva budzie raźvivać niezaležna ad vynikaŭ pieramovaŭ z Zachadam ab budučyni Ukrainy i jaki maje dapamahčy ŭmacavańniu jaje pazicyj na «suśvietnaj arenie».

Pavialičyć

Aŭtary dakłada pryznajuć, što Rasii daviadziecca «hulać udoŭhuju» kab utrymać krainy Centralnaj Azii ŭ svajoj arbicie. Jany zaŭvažajuć, što hetym krainam daviadziecca «pryniać rašeńnie ab svajoj pazicyi ŭ dačynieńni da Rasii», ale padrabiaznaści nie raskryvajucca.

U toj ža čas dakład nazyvaje Biełaruś samym paśpiachovym prykładam rasijskaha ŭpłyvu. U jakaści ilustracyi pryvodzicca evalucyja pazicyi Alaksandra Łukašenki.

Tak u 2018 hodzie jon zaklikaŭ da ekanamičnaj dyviersifikacyi — źnižeńnia zaležnaści Biełarusi ad Rasii i pašyreńnia handlovych suviaziej ź inšymi krainami. Praz šeść hadoŭ Łukašenka vystupaje z zajavaj ab tym, što «my zaŭsiody budziem adzinyja z Rasijaj».

Chacia Rasija paśpiachova prasoŭvaje intehracyju ź Biełaruśsiu, raźvićcio Jeŭrazijskaha ekanamičnaha sajuza (JEAES), u jaki akramia Biełarusi ŭvachodzić Armienija, Kazachstan i Kyrhyzstan, sutykajecca z «sistemnymi prablemami».

Da ich adnosiacca sankcyjnyja ryzyki, pakolki ciesnyja suviazi z Rasijaj mohuć pryvieści da druhasnych abmiežavańniaŭ, składanaści z vykarystańniem roznych płaciežnych sistem paśla adklučeńnia Maskvy ad SWIFT, a taksama valutny kantrol, uviedzieny Rasijaj dla abarony svajoj ekanomiki.

• 1
• 0
• 9
• 9
• 0
• 0
• 36
• 0