U Biełarusi šmat pytańniaŭ, jakija patrabujuć abmierkavańnia z Polščaj, zajaviŭ ministr zamiežnych spraŭ Biełarusi Maksim Ryžankoŭ u efiry «Biełaruś 1».
U adkaz na pytańnie, jak MZS adreahuje na acenku biełaruskich vybaraŭ polskim ministram Radasłavam Sikorskim, jon skazaŭ: «Nie suj nos tudy, kudy tabie nie treba».
Pry hetym Maksim Ryžankoŭ zapeŭniŭ, što biełaruski bok adkryty dla dyjałohu z polskimi ŭładami, bo jość šmat pytańniaŭ, jakija patrabujuć abmierkavańnia i vyrašeńnia.
«Ministerstva zamiežnych spraŭ Polščy pra heta dakładna viedaje. U nas jość kantakty, my ŭ papiarednim paradku pra heta havorym», — zajaviŭ biełaruski ministr.
Kiraŭnik biełaruskaha źniešniepalityčnaha viedamstva nahadaŭ, što aficyjnyja polskija ŭłady nibyta zrabili staŭku na emihrantaŭ, jakija imkliva hublajuć apošnija reštki padtrymki na Zachadzie. «I ŭžo palaki, i litoŭcy pavodziać siabie, jak hulec, jaki, viedajecie, prajhraŭ usio, ale ŭvieś čas dumaje adyhracca, pavyšaje staŭki», — adznačyŭ Maksim Ryžankoŭ.
Na jaho dumku, emacyjnuju reakcyju zachodnich krain na padziei ŭnutry Biełarusi možna rastłumačyć tym, što situacyja dla ich intaresaŭ składvajecca ŭsio horš.
Kamientary