Čas čakańnia vyras, cana taksama. Z-za novych pravił pracy taksi niekatoryja pasažyry sutyknulisia z prablemaj

Ź siońniašniaha dnia ŭstupajuć u siłu novaŭviadzieńni ŭkaza №32 «Ab aŭtamabilnych pieravozkach pasažyraŭ».

Pačynaje pracavać «Rejestr aŭtapieravozak pasažyraŭ u nierehularnym złučeńni», jaki źmiaščaje źviestki ab pieravozčykach (aŭtobusach, lehkavych aŭtamabilach, aŭtamabilach-taksi), kiroŭcach, dyśpietčarach. I ź siońniašniaha dnia ŭsie, chto praciahnie pracavać u nierehularnych pieravozkach, nie ŭklučyŭšysia ŭ rejestr, buduć ličycca nielehałami i nieści adkaznaść pa artykule 13.3 KoAP «Niezakonnaja pradprymalnickaja dziejnaść» (pakarańnie — až da kanfiskacyi transpartnaha srodku).

Hałoŭnaje pytańnie, jakoje chvaluje abyvaciela: jak heta adabjecca na pracy taksi? Bo popyt napeŭna zastaniecca raniejšym, ci zmoža jaho zadavolić prapanova, ci budzie dastatkova kiroŭcaŭ taksi, asabliva na pieršym časie paśla ŭstupleńnia novaŭviadzieńniaŭ u siłu?

Ranicaj situacyja nastupnaja: popyt pavyšany, kaeficyjent dosyć vysoki. Ale nie rekordny — prynamsi, pra kałaps havorka nie idzie. Ale źviartaje na siabie ŭvahu značny čas padačy aŭto.

Žurnalisty atrymali niamała vodhukaŭ ad čytačoŭ za hetuju ranicu. Ahulnaja vysnova takaja: usie adznačajuć albo pavieličeńnie koštu zvyčajnych pajezdak, albo pavieličeńnie času čakańnia taksi, albo i toje, i inšaje.

— Siońnia kala 08:30 nie mahli vyklikać taksi z Uručča, syšło chvilin 40. Pierasprabavali ŭsie taryfy pry hetym — mašyna nie znachodziłasia. Ź ciažkaściu vyklikali. Košt — 25 rubloŭ, ale heta pajezdka za MKAD, taki košt i raniej časam byvaŭ, — padzialiłasia čytačka.

— Za 8 km siońnia sa Ściapianki da Dzianisaŭskaj košt byŭ udvaja vyšejšy! A ja ž jezdžu ŭ adzin i toj ža čas zaŭsiody, — jašče adna skarha.

Pavialičyć

— Ja žyvu ŭ Marjinaj Horcy. Taksi było jak zvyčajna, a voś košt vyras na 2 rubli, — raspavioŭ jašče adzin čytač.

— Heta žach. My cełuju hadzinu nie mahli vyklikać mašynu, ja navat patelefanavaŭ na haračuju liniju Transpartnaj inśpiekcyi. U mianie ludzi spaźnilisia na ciahnik i nie źjechali prosta, — raspavioŭ inšy čytač.

— U Malinaŭcy ranicaj było nie vyklikać mašynu za najaŭnyja. A pa bieznajaŭnym raźliku — 15 chvilin čakańnie, — śćviardžaje jašče adzin surazmoŭca.

— Učora maršrut kaštavaŭ 8,1 rubla, siońnia — bolš za 17 rubloŭ, — kanstatuje karystalnik taksi.

Pavialičyć

— U paniadziełak, 28 kastryčnika, biez pavyšalnych kaeficyjentaŭ pajezdka ź Sierabranki na ŭschod u taryfie «kamfort» kaštavała 14 rubloŭ. Zaraz pravieryŭ — 21 rubiel u «ekanomie» biez pavyšajučych kaeficyjentaŭ. Čas i nadvorje prykładna adnolkavyja. Vydatnaje palapšeńnie, vielmi padabajecca, — raspaviadaje čytač.

Na rost koštu paskardziŭsia i karystalnik taksi ź Minska: za pajezdku praciahłaściu 19 chvilin jamu patrabavałasia zapłacić minimum 22,8 rubla (taryf «ekanom»), za 25-chvilinnuju pajezdku — prynamsi 35 rubloŭ.

— Heta prosta kosmas! Da Bieraścia ŭ kupe možna dajechać za 27 rubloŭ, — aburany jon.

Pavialičyć

Inšy čytačy śćviardžajuć, što mnohija kiroŭcy taksi siońnia vyjšli na pracu jašče i tamu, što ahrehatar uvioŭ značny kaeficyjent dla pracy ŭ Minsku, a taksama inšyja bonusy.

Adnak, niahledziačy na kaeficyjenty, da abiedu servis «Jandeks Go» staŭ papiaredžvać karystalnikaŭ ab tym, što kiroŭcaŭ na linii mienš, čym zvyčajna.

Pavialičyć

«Kali śpiašajciesia, lepš vybrać inšy transpart», — paznačana ŭ dadatku. Zdajecca, i nie ŭspomnić, kali jašče byvała takoje papiaredžańnie.

• 0
• 0
• 3
• 1
• 1
• 0
• 2
• 0