Małady chłopiec pierajechaŭ u viosku, zavioŭ kurej z kozami i staŭ zorkaj tyktoku
Andrej pierajechaŭ u viosku sa stalicy vosiem hadoŭ tamu, a potym zavioŭ błoh pra svajo žyćcio. Siabie padpisaŭ łakanična: «Dzieravienščyna Andrej».
Ciapier za jaho budniami nazirajuć 123 tys. padpisčykaŭ u TikTok. A jašče videa časta zalatajuć u rekamiendacyi i nabirajuć sotni tysiač prahladaŭ. Čamu na vioscy žyć dobra i ŭ čym sakret papularnaści błoha pra prostaje viaskovaje žyćcio, raskazvaje «Točka».
Ź vioski — ź luboŭju
U viosku Zarečča Staŭbcoŭskaha rajona Andrej pierajechaŭ mienš za dva miesiacy tamu, jašče abžyvajecca. Hety dom jamu prapanavała padpisčyca — pažyć prosta tak, biez apłaty. Ciapier ža chłopiec padumvaje jaho kupić.
«Raniej zdymali dom u Smalavičach — addali za hod kala $3000. A potym prosta napisała dziaŭčyna. Kaža, staić dom — tolki zajazdžajcie. Hazavaje aciapleńnie jość, vanna i tualet u domie. My i pierajechali», — raskazvaje Andrej.
Pieravozili ŭsiu haspadarku i rečy cełaj 20-tonnaj furaj — i suma za źmienu miesca vyjšła astranamičnaj.
«Kozam nadzieli pampiersy», — śmiajecca chłopiec.
Vierandu ŭ domie Andrej zrabiŭ svaimi rukami.
Pradmiety dekoru — usio, što znajšłosia ŭ domie i chlavu. Asablivy honar — čyrvony taršer, jaki dastali z kuratnika i adšaravali ad pamiotu.
«Plus staroha doma — u im zaŭsiody jość vialikija zapasy siervizaŭ i kryštala na ŭsie vypadki žyćcia», — prynosić harbatu i ŭstupaje ŭ hutarku žonka Andreja Sonia.
Posud u domie doŭha nie zachoŭvajecca: kozy zanadta nastojliva sprabujuć dałučycca da čajavańnia.
Raz-poraz naroviać zaleźci na stoł, paciahnuć prysmak i navat papić z kubka. Tolki adviarnuŭsia — razhornuć usio.
U Minsku ničoha nie trymała
Kali Andreju było 17, baćki kupili lecišča pad Radaškovičami. Jeździli tudy pieryjadyčna, jak usie — na adpačynak.
«Ja pracavaŭ u sałonie druku 10 hadoŭ zapar. I ŭ niejki momant razumieju: nie chaču viartacca dadomu, u kvateru. Pačaŭ jeździć na lecišča, niešta vyroščvać: kvietki, kabački, ažynu. Tak i ŭciahnuŭsia, pačaŭ tam zastavacca. Mianie ničoha nie trymała ŭ Minsku — ničoha cikavaha», — uspaminaje Andrej.
Ciapier chłopiec pracuje anłajn — možna žyć dzie zaŭhodna. Tamu dzie tolki nie pabyvaŭ. Try hady tamu z žonkaj pracavali na fiermie paŭlinaŭ na Kipry. Potym — u Hruzii na śvinafiermie, pad Maskvoj na fiermie alpak. Dalej — na biełaruskaj ślimakovaj fiermie. Čamu taki vybar? Kaža, prosta było kajfova.
«Takoje ŭnutranaje imknieńnie: mnie chočacca hetym zajmacca, mnie heta padabajecca. Prosta lublu heta. Usio tak i pracuje: što padabajecca, toje i vystrelvaje», — kaža Andrej.
U vioscy stała źjaŭlacca svaja haspadarka, a razam z žyviołami — i błoh.
Nazvali kazła ŭ honar načalnika
Spačatku byli kurački.
«Maje dziaŭčatki karamielnyja. Lublu ich. Zabivać ja ich, viadoma ž, nie budu. U mianie žyvioły buduć prosta žyć i radavacca», — pravodzić ekskursiju błohier.
Hadavancam dajuć imiony padpisčyki — varyjanty mohuć prapanoŭvać tyja, chto aktyŭna danacić i dapamahaje maleńkaj haspadarcy.
Da prykładu, u Andreja žyvie kazioł pa mianušcy Adel — tak jaho paprasiŭ nazvać padpisant z Hiermanii… u honar svajho kiraŭnika.
«Kozačak Kiru i Arynu mnie padaryli. Padpisčyki spytali: «Chočaš koz?» Viadoma, chaču, u mianie naohuł takoje pytacca nielha. Usich siudy — usich budu lubić», — śmiajecca chłopiec.
Paśla kurej byli kački, potym — husi, indyki. Pierapiołak taksama addali. Usiaho pa krychu, haspadarka nievialikaja.
«Husiatki maje. Kuplaŭ ich užo darosłymi, tak jany da hetaha času trochi ludziej pabojvajucca, dzikavatyja. Inšaja sprava, kali vyroščvaješ ptušaniat sam, prosta ź jajka ŭ inkubatary», — sprabuje pakazać ptušak haspadar.
Chłopiec mnohaje robić svaimi rukami — i chleŭ dla žyvioł uładkavaŭ, i navioŭ paradak u dvary.
Miljony prahladaŭ
Pra ŭsio heta Andrej raskazvaje ŭ svaim błohu. Na mantaž adnaho videa idzie kala čatyroch hadzin. Ale jano taho varta: pačnieš hladzieć — nie spynišsia.
«Pieršaje videa, jakoje zalacieła, — pra toje, jak ja vyroščvaju viešanki. Na 3 młn prahladaŭ! I z tych časoŭ pajšło. Ale błoh ja spačatku aktyŭna nie vioŭ. A potym padumaŭ: čamu b i nie? U mianie ž vielizarny dośvied pracy z kantentam, prasoŭvańniem. Tym bolš što ŭ mianie heta vielmi dobra atrymlivajecca», — kaža Andrej.
Na ŭčastku jašče šmat pracy. U płanach — pabudavać tut novy dom. I zavieści kania — chłopiec vielmi pra heta maryć. Nu i, viadoma ž, praciahvać vieści svoj viaskovy błoh.
Padpisčyki padtrymlivajuć: danatami, pa haspadarcy, z ramontam — tolki praciahvaj zdymać. Metavaja aŭdytoryja absalutna roznaja: usie ŭzrosty i roznyja intaresy.
«Ludziam padabajecca hety vajb. Hałoŭnaja ideja videa — good mood. U mianie atrymlivajecca heta — padaryć čałavieku dobry nastroj. Značyć, treba praciahvać», — kaža błohier.
Ciapier čytajuć
Chto tyja 17‑hadovy błohier i jaho 37‑hadovaja niaviesta, jakija šykoŭna žyli na miljon, skradzieny sa zboru na chvoraje dzicia?35
Kamientary