Saudaŭski prajekt «razumnaha horada» Nieom časam pieraŭzychodzić miežy razumnaha
Ambicyi naślednaha prynca Saudaŭskaj Aravii šakujuć navat prajektantaŭ.
Kali naśledny prync Saudaŭskaj Aravii Muchamied ibn Sałman ździejśnić svaju maru koštam 500 miljardaŭ dalaraŭ, na miescy pustyni źjavicca horad budučyni Nieom, jaki musić pryciahnuć vializnyja inviestycyi. Heta, u svaju čarhu, dapamoža karaleŭstvu źmienšyć svaju zaležnaść ad nafty da taho, jak jaje zapasy ŭ krainie skončacca, piša The Wall Street Journal.
Słova «nieom» utvorana ad hrečaskaj prystaŭki «nieo» ŭ značeńni «novy», a čaćviortuju litaru ŭziali z arabskaj abrevijatury, što rasšyfroŭvajecca jak «budučynia».
Adnak pakul raspracoŭka prajekta idzie marudna, a rabotniki masava sychodziać praź nieparazumieńni na hlebie ambicyj prynca datyčna bačańnia prajekta.
Naprykład, inžyniery zmahajucca z patrabavańniami zrabić pahłybleńnie ŭ schile hary na 30 pavierchaŭ uhłyb i 800 mietraŭ udoŭžki dla raźmiaščeńnia tam hatelaŭ i rezidencyj. Jašče adzin kanflikt razhareŭsia na fonie dyrektyvy ab budaŭnictvie 10 pałacaŭ, kožny ź jakich bolšy za futbolnaje pole. Heta prymusiła supracoŭnikaŭ zadumacca pra metazhodnaść budaŭnictva takich raskošnych budynkaŭ, jakija buduć kaštavać kala 400 miljonaŭ dalaraŭ kožny.
Architektary prapanoŭvajuć bolš prostuju i realistyčnuju płaniroŭku horada, ale prync zahadvaje dumać šyrej.
35-hadovy Muchamied ibn Sałman maje hrandyjoznyja płany na Nieom. Adna z zadumak — pabudavać u centry Nieoma liniejny horad biez mašyn na 170 km udoŭžki, jaki budzie złučany z astatnimi častkami prajekta vysakachutkasnym ciahnikom.
«Razumny» horad buduć akružać jašče 4 inšyja abjekty — zaliŭ Nieom, rajon Akaby, hara Nieom i pramysłovy horad. Miarkujecca, što Nieom budzie mieć 14 pramysłovych siektaraŭ, u tym liku enierhietyku i vytvorčaść praduktaŭ charčavańnia.
Niekatoryja ekśpierty skieptyčna staviacca da takich płanaŭ, jakija, na ich dumku, niemahčyma ažyćciavić. Mnohija supracoŭniki pierakananyja, što prajekt nie pryciahnie dastatkovuju kolkaść inviestycyj, a zakony, jakija karaleŭstva namahajecca pryniać dla Nieoma, nie pryjducca daspadoby zamiežnikam.
Ciapierašnija i byłyja supracoŭniki śćviardžajuć, što vykanaŭčy dyrektar prajekta Nadmi al-Nasr, jaki 30 hadoŭ pracavaŭ u naftavaj kampanii Aramco, imkniecca realizavać usie žadańni prynca. U vyniku supracoŭniki, niezadavolenyja stylem kiravańnia, admaŭlajucca ad kantraktaŭ na vializnyja sumy, a niekatoryja ŭvohule nie zmahli viarnucca ŭ Saudaŭskuju Araviju letaś praz abmiežavańni. Tamu prajekt ažyćciaŭlajecca marudna.
Biełaruski IT-miljarder Hurski: Maju pieršuju žonku zabiŭ hiembler5
Kamientary