Izrailskaja avijakampanija, jakaja zajaŭlała pra adnaŭleńnie palotaŭ u Minsk, pieradumała heta rabić

Izrailskaja avijakampanija Arkia, jakaja zajaŭlała pra adnaŭleńnie pramych rejsaŭ pamiž Minskam i Tel-Avivam paśla dzieviacihadovaha pierapynku, faktyčna admoviłasia ad palotaŭ i spyniła prodaž kvitkoŭ. Pry hetym na maršrucie ŭžo pačaŭ pracavać inšy pieravozčyk, piša Blizko.by.

Fota ilustracyjnaje

U pačatku śniežnia paviedamlałasia, što Arkia płanuje vykonvać rejsy ź Minska ŭ Tel-Aviŭ pa paniadziełkach i piatnicach z 2 lutaha da 27 sakavika 2026 hoda. Kvitki tady pradavalisia pa canie ad 244 dalaraŭ u adzin bok, choć u raskładzie Nacyjanalnaha aeraporta Minsk hetyja rejsy jašče nie byli paznačanyja.

Adnak pieršy zapłanavany palot, jaki musiŭ adbycca 2 lutaha, na anłajn-tabło minskaha aeraporta tak i nie źjaviŭsia. Choć paźniej rejsy Arkia byli ŭniesienyja ŭ siezonny raskład (z 6 lutaha, taksama pa paniadziełkach i piatnicach), na sajcie samoj avijakampanii kirunak na Minsk bolš niedastupny dla braniravańnia. Sistema nie znachodzić nivodnaha kvitka i prapanuje źmianić daty abo napramak.

Arkia ŭžo mieła dośvied palotaŭ u Biełaruś — ź viasny 2016 da vosieni 2017 hoda. Raniej rejsy ŭ Tel-Aviŭ vykonvała i «Biełavija»: spačatku ŭ 1990-ch, a zatym z 2008 hoda da lutaha 2022-ha, ź pierapynkam padčas pandemii. 8 studzienia 2026 hoda «Biełavija» znoŭ adnaviła paloty ŭ Izrail, u toj čas jak adnaŭleńnie rejsaŭ Arkia, jak vyśvietliłasia, zastałosia tolki zajavaj.

Kamientary da artykuła