Sioleta ŭ konkursie na najlepšuju paštovuju marku hoda ŭpieršyniu za 4 hady pieramahli nie siłaviki

U Biełarusi praz narodnaje hałasavańnie vyznačyli najlepšuju paštovuju marku 2025 hoda, paviedamiła pres-słužba «Biełpošty». Hety konkurs tradycyjny i pravodzicca štohod.

Try sioletnija pieramožcy. Fota: Belpost.by

U 2025 hodzie ŭ konkursie ŭdzielničała bolš za 50 roznych marak, u hetym hodzie jaho pravodzili z 17 pa 28 śniežnia. Svaje hałasy na sajcie «Biełpošty» addali 3788 čałaviek.

Pieršaje miesca zaniała marka «Biełaruskamu Radyjo 100 hadoŭ». Jaje paličyli najlepšaj 1555 čałaviek. Dyzajn hetaj marki vykanany Alenaj Miadźviedź.

Na druhim miescy — marka «Tralejbus 43300D. «BKM Chołdynh», 2019 h.» z fatahrafijaj Michaiła Malucina. Dyzajnierka tut — Jaŭhienija Biadonik, marka nabrała 1414 hałasoŭ.

Treciaje miesca — u marki «Z Novym hodam i Naradžeńniem Chrystovym!», jakuju stvaryła dyzajnierka Maryna Krezo. Za jaje prahałasavali ŭsiaho 189 čałaviek, ale hetaha chapiła, kab trapić u pryzy.

Sioletnija vyniki konkursu pałamali peŭnuju tendencyju raniejšych hadoŭ. Pierad tym u konkursie «Biełpošty» try hady zapar pieramahali marki, źviazanyja ź siłavymi strukturami. U minułym hodzie heta była marka, pryśviečanaja hadavinie vyvadu savieckich vojskaŭ z Afhanistana. U 2023‑m pieršaje miesca było ŭ marki «Ratavalnik», pryśviečanaj supracoŭnikam Ministerstva nadzvyčajnych situacyj, a ŭ 2022‑m — u marki «Słužbovyja sabaki Pamiežnaj słužby Biełarusi».

Pry hetym konkurs 2022 hoda nie abyšoŭsia biez skandału z palityčnym adcieńniem. Tady adnym z pretendentaŭ na pieramohu, kali konkurs u kancy 2022 hoda tolki abviaścili, była marka likvidavanaj arhanizacyi «Achova ptušak Baćkaŭščyny» z vyjavaj biełaj sinicy, ale jaje adrazu ž źniali z konkursu, kali jana tolki stała vybivacca napierad.

Kamientary da artykuła