Ejsmant zajaviła, što Litva «stralaje sabie pamiž noh»

Pres-sakratarka Alaksandra Łukašenki Natalla Ejsmant u kamientary rasijskamu ahienctvu TASS zajaviła, što Litva, maŭlaŭ, pavodzić siabie niedalnabačna ŭ situacyi ź bieśpiłotnikam, jaki 30 listapada nibyta parušyŭ miažu Biełarusi.

Natalla Ejsmant. Fota: Maxim Shemetov Pool Photo via AP

«Što tyčycca litoŭcaŭ — sieŭšy ŭ łužynu ŭ svoj čas z zakryćciom miažy, litoŭcy dapuskajuć čarhovyja hłupstvy, jakija abiernucca suprać ich. Dumajem, ni biełaruskamu, ni litoŭskamu narodu heta nie treba, ale my hatovyja da ŭsiaho», — skazała Ejsmant.

Pavodle jaje słoŭ, Vilnia ŭžo «stralała sabie ŭ nahu», zakryŭšy miažu, a ciapier «stralaje sabie pamiž noh». Taksama Ejsmant zajaviła, što Minsk chutka «ŭbačyć sapraŭdnyja mety i namiery» Litvy.

Łukašenku, jaki ciapier adpačyvaje ŭ Amanie, taksama pra situacyju ŭžo nibyta «absalutna i detalova prainfarmavali», paśla čaho jon daŭ niejkija daručeńni «Kamitetu dziaržaŭnaj biaśpieki i ŭsim inšym nieabchodnym strukturam».

Raniej paviedamlałasia, što MZS Biełarusi padało Litvie pratest u suviazi ź incydentam i patrabuje rasśledavańnia. Dziaržaŭnyja prapahandysty śćviardžajuć, što dron byŭ nibyta raźviedvalnym i pierad padzieńniem skinuŭ «ekstremisckija materyjały». Jak takija traktujucca bieł-čyrvona-biełyja ściažki, bačnyja na adnym sa zdymkaŭ.

Pierad hetym Litva z 29 kastryčnika da 20 listapada zakryvała dziaržaŭnuju miažu ź Biełaruśsiu z-za pastajannaha zapusku ź biełaruskaha boku kantrabandnych mieteazondaŭ z cyharetami. U adkaz Minsk pierastaŭ vypuskać litoŭskija fury i pastaviŭ ich na płatnyja stajanki. I navat paśla adkryćcia miažy ŭsio adno ich nie vypuskaje.

Kamientary da artykuła