Zbor dla Vani Ściacenki zakryli hrašyma z aryštavanych srodkaŭ hrodzienskich błohieraŭ
Pra toje, što sumu, jakoj nie chapaje na lačeńnie dziciaci, nakirujuć na jaho karyść z aryštavanych srodkaŭ padazravanych, paviedamiŭ Śledčy kamitet.
Jaŭhienija Tarasienka i Michaił Drahun
Hrošy źbiralisia dla vaśmihadovaha Vani Ściacenki, u jakoha ciažkaja hienietyčnaja chvaroba — mijadystrafija Diušena. Nieabchodny chłopcu ŭkoł kaštuje 2,9 miljona dalaraŭ.
4 listapada stała viadoma, što dvuch hrodzienskich błohieraŭ, 37‑hadovuju Jaŭhieniju Tarasienku i 17‑hadovaha Michaiła Drahuna, zatrymali pa padazreńni ŭ machlarstvie ŭ asabliva bujnym pamiery. Pavodle źviestak MUS, jany źbirali hrošy, pravodziačy rozyhryšy pryzoŭ z płatnym udziełam — za 10 rubloŭ. Błohiery zajaŭlali, što amal usia suma pojdzie na lačeńnie dziciaci. Ale z sabranych 1,5 miljona rubloŭ mamie dziciaci addali tolki kala 200 tysiač.
7 listapada abodva błohiery byli adpuščanyja pad padpisku ad niavyjeździe.
Suprać Tarasienki i Drahuna zaviali kryminalnuju spravu pa artykule «machlarstva ŭ asabliva bujnym pamiery». Im pahražaje da 12 hadoŭ pazbaŭleńnia voli. Ciapier rasśledavańnie kryminalnaj spravy, jak paviedamiŭ Śledčy kamitet, praciahvajecca, a kančatkovaja pravavaja acenka dziejańniam błohieraŭ budzie dadziena pa vynikach śledstva.