Ministr transpartu raskazaŭ, jak buduć vykonvać zahad Łukašenki razabracca z maršrutkami
Kupiać novyja aŭtobusy, ale ci buduć tyja patrebnyja, čynoŭniki pakul nie viedajuć.
Fota: lookby.media
Ministr transpartu i kamunikacyj Alaksiej Lachnovič zapeŭniŭ: kompleksnaje rašeńnie znojdziena i budzie realizavana ŭ najbližejšy čas, kab situacyja palepšyłasia.
Pa-pieršaje, Minabłvykankam nabudzie 15 aŭtobusaŭ dla kursiravańnia ŭ bok Žodzina, Barysava i nazad. Takim čynam, transpart budzie chadzić čaściej.
Zapłanavanaja da zakupki technika — bolš umiaščalnaja za maršrutnyja mikraaŭtobusy, padkreślivaje čynoŭnik.
Ale i maršrutki taksama praciahnuć vazić ludziej, zapeŭniŭ ministr.
Raźmiarkoŭvać aŭtobusy buduć z ulikam pasažyrapatoku. Jon, pavodle danych ministra, na hetym kirunku składaje kala 600 čałaviek za hadzinu.
Akramia taho, kupić bilety dla prajezdu ŭ hetym kirunku možna budzie ŭ kijosku na prypynku abo praź internet. Tak pasažyry zmohuć sadzicca ŭ sałon užo ź biletami, a nie stajać pa ich da kiroŭcy. Jamu nie pryjdziecca hublać čas na pieralik hrošaj, vydaču rešty.
— Minskaja vobłaść budzie vyrašać, kolki aŭtobusaŭ u tym ci inšym kirunku dadać, — udakładniŭ kiraŭnik Mintransa.
Jon nie vyklučyŭ, što, kali čerhaŭ nie budzie, a aŭtobusy pry hetym nie buduć zapaŭniacca, ich častku puściać na inšyja kirunki, dzie zahruzka vyšejšaja.
14 listapada Alaksandr Łukašenka na naradzie ab vynikach raboty BiełAES niečakana zahavaryŭ pra maršrutki i čerhi na ich.
Jon aburyŭsia niedachopam hramadskich vidaŭ transpartu ŭ pryharadnym i mižharodnim złučeńni.
«Ludzi kryŭdziacca: stajać, asabliva ŭ hadziny pik, pa 150 mietraŭ, jak jany pišuć, u čerhach, kab ucisnucca ŭ hetuju maršrutku śmiardziučuju, — skazaŭ jon. — Słuchajcie, čaho vy ź ludziej ździekujeciesia?!»
«My što, nie možam zamianić hetyja maršrutki, Alaksandr Hienrychavič, aŭtobusami? — zaŭvažyŭ Łukašenka, źviartajučysia da premjer-ministra Alaksandra Turčyna. — Treba pastavić, až da taho, što nie tolki na ruchavikach unutranaha zharańnia aŭtobusy, ale i elektrobusy pastavić. I chaj iduć».
Čytajcie taksama:
«A ludziej spytać?» Adny klanuć Łukašenku za namier likvidavać maršrutki, inšyja chvalać
«Čaho ź ludziej ździekujeciesia?!» Łukašenka zahadaŭ prybrać maršrutki
Kiroŭcaŭ aŭtobusaŭ papularnaha ŭnutrybiełaruskaha maršruta adzieli va ŭniformu
U Biełarusi skardziacca na žachlivy deficyt kiroŭcaŭ. A jakija zarpłaty im prapanujuć?
DAI abjaviła vajnu maršrutkam. A dzie jašče ŭ śviecie katajucca na ich?