Geely pačynaje vytvorčaść pratatypaŭ aerataksi
Daččynaja kampanija kitajskaha aŭtamabilnaha hihanta Geely — Aerofugia — pačała vytvorčaść pratatypaŭ šaścimiesnaha elektryčnaha aerataksi ź viertykalnym uźlotam i pasadkaj. Kampanija jašče nie pačała masavuju vytvorčaść, a na ŭsiu jaje pradukcyju na hod napierad užo vystraiłasia čarha z pakupnikoŭ.
AE 200‑100. Fota: zgh.com
U śviecie, dzie mabilnaść imkliva raźvivajecca, najbolšuju ŭvahu pryciahvajuć aerataksi. Hetyja latalnyja aparaty mohuć vyrašyć prablemu haradskich zatoraŭ, zabiaśpiečyć chutkaje reahavańnie ŭ nadzvyčajnych situacyjach i adkryć novyja mahčymaści dla turyzmu. Da taho ž, jany značna bolš ekałahičnyja ŭ paraŭnańni z tradycyjnymi viertalotami.
Jak paviedamlaje Electrive.com, niadaŭna kampanija Aerofugia Technology, daččynaja kampanija aŭtamabilnaha hihanta Geely Group pradstaviła madel AE 200‑100 — svoj pieršy sieryjny pratatyp elektryčnaha latalnaha aparata ź viertykalnym uźlotam i pasadkaj (eVTOL), što dazvalaje jamu abychodzicca biez uźlotna-pasadačnaj pałasy — dastatkova placoŭki pamieram ź viertalotnuju.
Zboračnaja linija raźmiaściłasia ŭ horadzie Čendu, a sam aparat staŭ pieršym pasažyrskim eVTOL, raspracavanym u Kitai.
Madel uražvaje svaimi pamierami: daŭžynia — 9 mietraŭ, vyšynia — 4,6 mietra, razmach kryłaŭ — 14,5 mietraŭ. Čatyry pavarotnyja vinty na kryłach adkazvajuć za ruch napierad padčas palotu. Čatyry nieruchomyja padjomnyja rotary zabiaśpiečvajuć viertykalnuju ciahu pry ŭźlocie i harantujuć stabilnaje zavisańnie, navat kali adna ź sistem vyjdzie z ładu.
U AE 200‑100 moža raźmiaścicca 6 čałaviek (razam ź piłotam). Maksimalnaja ŭźlotnaja vaha: kala 2500 kiłahramaŭ. Jaho krejsierskaja chutkaść u 248 km/h i dalnaść u palotu ŭ 200 kiłamietraŭ idealna padychodzić dla haradskich pavietranych pieravozak, nizkavyšynnaha turyzmu i ekstrannych vyratavalnych apieracyj. Čakajecca, što jaho ekspłuatacyjnyja vydatki buduć značna nižejšymi, čym u tradycyjnych viertalotaŭ.
Na šlachu da masavaj vytvorčaści
Pieršyja vyprabavalnyja paloty AE 200‑100 adbylisia jašče ŭ 2023 hodzie, a ŭ mai 2025 hoda Aerofugia atrymała ad Upraŭleńnia hramadzianskaj avijacyi Kitaja siertyfikat na ažyćciaŭleńnie nierehularnych pasažyrskich i turystyčnych rejsaŭ u paŭdniova-zachodnim rehijonie krainy.
Pačatak vytvorčaści pratatypaŭ aznačaje, što prajekt ustupaje ŭ zaviaršalnuju fazu siertyfikacyi lotnaj prydatnaści i źjaŭlajecca apošnim krokam pierad zapuskam sieryjnaj vytvorčaści, jakaja zapłanavana na 2026 hod.
U adroźnieńnie ad kankurentaŭ, jakija robiać staŭku na całkam aŭtanomnyja paloty, Aerofugia zrabiła razumny vybar na karyść biaśpieki i zvykłaści, uklučyŭšy ŭ ekipaž piłota.
Hety padychod užo znajšoŭ stanoŭčy vodhuk jak u rehulataraŭ, tak i ŭ pieršych zakazčykaŭ: kampanija atrymała zakazy na bolš čym 1000 adzinak AE 200‑100 z Kitaja i Tajłanda. Vytvorčyja mahutnaści na pieršy hod pracy ŭžo całkam zareziervavanyja.
Z ulikam reformaŭ pavietranaj prastory Kitaja i mahutnaściej Geely, Aerofugia maje ŭsie šancy zaniać lidzirujučyja pazicyi na rynku aerataksi i pavietranaha turyzmu. Kampanija taksama płanuje ekspartavać svaju pradukcyju ŭ krainy Paŭdniova-Uschodniaj Azii, Blizkaha Uschodu i Jeŭropy. Pahladzim, mahčyma, u chutkim časie ich stanuć źbirać i ŭ Biełarusi.
Čytajcie taksama:
Budučynia nastupiła: Kitaj płanuje raźvivać latajučy bieśpiłotny transpart
Amierykanskaja kampanija pakazała latajučy aŭtamabil VIDEA
Kitajcy vyrabili realny samalot-nievidzimku. Heta moža mieć nastupstvy dla bałansu siłaŭ