Rasijskija źniščalniki parušyli pavietranuju prastoru Estonii
19 vieraśnia try rasijskija źniščalniki MiH-31 parušyli pavietranyja miežy Estonii kala vostrava Vajndła. Pavodle Hienštaba Sił abarony krainy, jany znachodzilisia ŭ pavietranaj prastory kala 12 chvilin biez transpondara, palotnaha płana i suviazi z dyśpietčaram.
Estonski vostraŭ Vajndła. Fota: Wikimedia Commons
MZS Estonii vyklikaŭ časovaha pavieranaha Rasii i ŭručyŭ jamu notu pratestu. Ministr zamiežnych spraŭ Marhus Cachkna nazvaŭ situacyju biesprecedentnaj i nahadaŭ, što heta ŭžo čaćviortaje parušeńnie pavietranaj prastory z boku Rasii ŭ hetym hodzie.
Incydent adbyŭsia na fonie rostu napružanaści ŭ rehijonie. Raniej, padčas masiravanych udaraŭ Rasii pa Ukrainie ŭ noč na 10 vieraśnia, u pavietranuju prastoru Polščy zalacieli nie mienš jak 19 bieśpiłotnikaŭ, što prymusiła ŭpieršyniu padniać pa tryvozie źniščalniki NATA. Varšava rascaniła heta jak naŭmysnuju pravakacyju i zapuściła kansultacyi pa artykule 4 statuta NATA. Paśla hetaha aljans abviaściŭ apieracyju «Uschodni vartavy» dla ŭmacavańnia ŭschodniaha fłanhu, a prezident Polščy Karal Naŭrocki dazvoliŭ znachodžańnie vojskaŭ NATA ŭ krainie.
Padobnyja vypadki adbyvalisia i ŭ Rumynii: 13 vieraśnia rasijski bieśpiłotnik pravioŭ u pavietranaj prastory krainy amal 50 chvilin.
Tym časam z rasijskaha boku hučać rezkija zajavy. 8 vieraśnia namieśnik staršyni Rady biaśpieki Dźmitryj Miadźviedzieŭ zajaviŭ, što Finlandyja nibyta rychtuje płacdarm dla napadu na Rasiju paśla ŭstupleńnia ŭ NATA, i pahražaŭ «kracham finskaj dziaržaŭnaści». Heta prahučała paśla taho, jak Uładzimir Pucin daručyŭ budavać umacavańni na miažy ź Finlandyjaj.