Kiraŭnik Pientahona zajaviŭ pra hatoŭnaść da apieracyi pa zrynańni Nikałasa Madura

Ministr abarony ZŠA Pit Chiehsiet u efiry telekanała Fox News paviedamiŭ, što Vašynhton moža pajści na apieracyju pa źviaržeńni ŭłady ŭ Vieniesuele. Jon adznačyŭ, što Bieły dom hatovy vykarystać usie siły armii, ale kančatkovaje rašeńnie zaležyć ad prezidenta Donalda Trampa, piša The Moscow Times.

Nikałas Madura. Fota: Jesus Vargas / Getty Images

Chiehsiet zajaviŭ, što ZŠA adkryta damahajucca adchileńnia ad ułady ŭ Vieniesuele Nikałasa Madura, jakoha jon nazvaŭ «kiraŭnikom narkakartelnaj dziaržavy». Pavodle jaho słoŭ, za aryšt Madura paabiacanaja ŭznaharoda ŭ 50 miljonaŭ dołaraŭ, bo jaho abvinavačvajuć va ŭdziele ŭ narkatrafiku, jaki nibyta škodzić amierykancam.

2 vieraśnia amierykanskija vajskoŭcy patapili karabiel u Karybskim mory, što išoŭ ź Vieniesueły i, pavodle śćviardžeńnia ŭładaŭ ZŠA, pieravoziŭ narkotyki. Prezident ZŠA Donald Tramp paviedamiŭ, što na borcie byli ŭdzielniki złačynnaj hrupoŭki Tren de Aragua, jakaja pracuje na intaresy Madura. U vyniku zahinuli 11 čałaviek.

Heta akcyja stała častkaj šyrejšaj vajennaj apieracyi. Naprykancy žniŭnia Tramp adpraviŭ u rehijon bajavuju hrupu z krejsieram, eśmincami, padvodnaj łodkaj i desantnymi karablami, na jakich słužać kala 4,5 tysiač vajskoŭcaŭ, dla baraćby z narkakartelami.

U Karakasie hetyja dziejańni nazvali ahresijaj. Madura acharaktaryzavaŭ pavieličeńnie vajskovaj prysutnaści ZŠA jak «varožuju abłohu» i źviarnuŭsia da kiraŭnika AAN Antoniu Huteryša z prośbaj abaranić niezaležnaść Vieniesueły.

U svaim telezvarocie paśla incydentu z karablom jon zajaviŭ, što ZŠA vykarystoŭvajuć temu baraćby z narkotykami jak začepku, kab atrymać dostup da vieniesuelskich pryrodnych resursaŭ.

Kamientary da artykuła