Renavacyja nie pa-rasijsku: chruščoŭki ŭ Minsku znosić nie płanujuć

Ułady Minska raniej abmiarkoŭvali budučyniu staroha žyłoha fondu, u tym liku «chruščovak», jakija raskidanyja pa roznych rajonach horada. U jakaści adnaho z varyjantaŭ navat razhladali rasijskuju madel renavacyi — kali zamiest kapitalnaha ramontu staryja damy znosiać, a na ich miescy budujuć novaje žyllo.

Zdymak ilustracyjny. Fota: kaktutzhit.by

Staršynia kamiteta architektury i horadabudaŭnictva Minharvykankama Viktar Hućko na pres-kanfierencyi, adnak, rastłumačyŭ, što ŭ Minsku taki padychod vykarystoŭvać nie płanujuć. Pavodle jaho słoŭ, znos «chruščovak» u najbližejšaj pierśpiektyvie nie praduhledžany.

Čynoŭnik padkreśliŭ, što dla stalicy ŭžo vyznačanaja aptymalnaja kolkaść nasielnictva — kala 2 miljonaŭ čałaviek. Heta aznačaje, što nieabchodnaść u maštabnym novym žyllovym budaŭnictvie źmianšajecca, tamu horad budzie bolš uvahi nadavać racyjanalnamu vykarystańniu tych terytoryj, što ŭžo jość.

Asnoŭny kirunak palityki — heta tak zvanaje «ahrańvańnie horada», h. zn. udaskanaleńnie i abnaŭleńnie najaŭnych haradskich kvartałaŭ, a nie ich poŭnaja zamiena. Važnym elemientam stratehii taksama zastajecca raźvićcio haradoŭ-spadarožnikaŭ, jakija pavinny źniać častku nahruzki ź Minska.

Ciapier u stalicy idzie hramadskaje abmierkavańnie novaha hienieralnaha płana raźvićcia horada, dzie hetyja pryncypy buduć zamacavanyja.

Kamientary da artykuła