Kitajskija daśledčyki prademanstravali dron pamieram z kamara

Novaja raspracoŭka dapamoža praviadzieńniu sakretnych i bajavych apieracyj.

Novaja raspracoŭka kitajskich inžynieraŭ — minijaciurny dron. Skryn videa: AATUINVEST / YouTube

Pra novuju raspracoŭku łabaratoryi robatatechniki ŭ Nacyjanalnym univiersitecie abaronnych technałohij (NUDT) u kitajskaj pravincyi Chunań paviedamlaje South China Morning Post.

Daśledčyki prademanstravali novy bieśpiłotnik pamieram z kamara. Jon dobra padychodzić dla raźviedki i vykanańnia inšych śpiecyjalnych bajavych zadač. Heta čarhovy prykład taho, jak nanatechnałohii i bijonika imkliva ŭvachodziać u śfieru vajskovaj pramysłovaści.

Na videa bačna, što bieśpiłotnik maje dva malusieńkija kryły ź listapadobnaj strukturaj, jakija prymacavanyja da bakoŭ pałačkapadobnaha korpusa, a taksama try tonkija, jak vałasy, «nožki».

Akramia hetaj madeli, vučonyja prademanstravali madel inšaha bieśpiłotnika, jaki maje čatyry kryłcy, dva ź jakich ruchajucca haryzantalna pa abodva baki korpusa. Kiravańnie adbyvajecca z dapamohaj smartfona.

Stvareńnie takich dronaŭ — składanaja inžyniernaja zadača. Usie klučavyja kampanienty — siensary, akumulatary, schiemy kiravańnia — pavinny źmiaścicca ŭ minijaciurnym korpusie. Heta patrabuje spałučeńnia roznych halin navuki: mikrapryborabudavańnia, materyjałaznaŭstva, bijoniki.

Vydańnie adznačaje, što raspracoŭka kitajskich inžynieraŭ nie pieršaja ŭ svajoj halinie. Niekatoryja krainy taksama majuć padobnyja drony. Naprykład, dron Black Hornet, stvorany ŭ Narviehii, užo aktyŭna vykarystoŭvajecca armijami pa ŭsim śviecie. Jon źmiaščajecca na dałoni, a kirujecca praz ručny pult. Jaho kamiera i siensary dazvalajuć raźviedčykam biaśpiečna nazirać za terytoryjaj. Adnak jon istotna bolšy pa pamierach za kitajskuju raspracoŭku.

Vajskoviec demanstruje dron Black Hornet. Fota: Flir.com

U 2021 hodzie VPS ZŠA paćvierdzili raspracoŭku ŭłasnych minijaciurnych bieśpiłotnikaŭ, ale dalejšych navin ab jakich-niebudź hatovych technałohijach abo ich razhortvańni nie było.

Aŭtary adznačajuć, što mikrarobatatechnika znachodzić prymianieńnie nie tolki ŭ vajennaj śfiery. Navukoŭcy daśledujuć mahčymaści miedycynskich mikro– i nanarobataŭ dla dyjahnostyki, chirurhii, dakładnaj dastaŭki lekaŭ i navat dla vizualizacyi ŭnutranych orhanaŭ.

Niahledziačy na pośpiechi, halina ŭsio jašče sutykajecca z techničnymi abmiežavańniami. Drony patrabujuć nadziejnych krynic siłkavańnia, ustojlivaści da vonkavych umoŭ i efiektyŭnych sistem suviazi. Adnačasova z hetym jany pavinny zastavacca maleńkimi, lohkimi i niezaŭvažnymi. Heta spryjaje rostu inviestycyj u novyja materyjały, nanapryłady i štučny intelekt.

Kamientary da artykuła