Amierykancy dabilisia vyzvaleńnia Juryja Ziankoviča. Jon byŭ prysudžany da 13,5 hoda źniavoleńnia

Pra toje, što vyjšaŭ na svabodu biełaruski palitviazień, abviaściŭ dziaržsakratar ZŠA Marka Rubia. CNN kaža, što havorka pra Ziankoviča.

Juraś Ziankovič paśla mahiloŭskaj turmy ŭ kancy 2024 hoda (źleva) i da aryštu (sprava)

Ziankovič, hramadzianin Biełarusi i ZŠA, znachodziŭsia za kratami ź viasny 2021 hoda, kali byŭ aryštavany ŭ Maskvie za ŭdzieł u virtualnaj sprobie «dziaržaŭnaha pieravarotu». Śpiecsłužbisty skarystalisia naiŭnaściu Ziankoviča i prapanavali jamu i palitołahu Alaksandru Fiadutu uznačalić vystup siłavikoŭ suprać Alaksandra Łukašenki. Tyja pahadzilisia i trapili na kručok.

Juraś Ziankovič naradziŭsia ŭ 1977 hodzie ŭ Minsku. Byŭ aktyvistam Partyi BNF, abiraŭsia ŭ Ždanovicki sielski saviet i Minski rajsaviet na miascovych vybarach. Kali byŭ deputatam, dabiŭsia, kab u pasiołku była vulica Vasila Bykava. U 2007 hodzie Ziankovič razam z baćkami emihravaŭ u ZŠA, atrymaŭ tam hramadzianstva. Zajmieŭ tam advakackuju licenziju, zajmaŭsia mihracyjnymi spravami. Časta pryjazdžaŭ u Biełaruś, sprabavaŭ vyłučacca ŭ deputaty Pałaty pradstaŭnikoŭ, zajaŭlaŭ pra prezidenckija ambicyi.

Ziankovič padpisaŭ pahadnieńnie sa śledstvam, ale ŭ vyniku atrymaŭ 11 hadoŭ źniavoleńnia — navat bolš, čym Fiaduta i Ryhor Kastusioŭ, jašče adzin udzielnik «zmovy». Kastusiova dadali ŭ čat, jon nie prymaŭ aktyŭnaha ŭdziełu ŭ abmierkavańni, ale tak i nie znajšoŭ u sabie siły vyjści z čata.

Juraś Ziankovič u sudzie ŭ 2022 hodzie

Ziankoviča adpravili ŭ babrujskuju kałoniju, dzie jon adrazu apynuŭsia pad ciskam. Z časam jaho pieraviali na turemnyja ŭmovy ŭ Mahiloŭ, ale pa-raniejšamu pieryjadyčna zakidvali ŭ ŠIZA, zabaraniali atrymlivać pieradačy i nie davali mahčymaści zakuplacca ŭ turemnaj kramie.

Termin tym časam pavialičyli da 13,5 hoda — paŭhoda dadali za «abrazu» pradstaŭnikoŭ ŭłady ŭ internecie, a dva hady — za niepadparadkavańnie administracyi kałonii.

U Mahilovie Ziankovič znachodziŭsia da kanca leta 2024, kali prapahanda vyrašyła zhulać amierykanskuju kartu. Ziankoviča pieravieźli ŭ SIZA KDB, dzie źniali ŭ prapahandysckim filmie, u jakim jon paprasiŭ Donalda Trampa i Kamału Charys — u zaležnaści ad taho, chto stanie prezidentam ZŠA — dapamahčy jamu viarnucca ŭ Techas. Adnak u internecie paśla hetaha abmiarkoŭvali pieradusim nie skazanaje Ziankovičam, a jaho źniešni vyhlad. Palityk u kadry vyhladaŭ viaźniem kancłahiera.

17 studzienia 2025 hoda źjaviłasia novaje videa z udziełam Ziankoviča. Jon vyhladaŭ značna lepš, a zdymali jaho nie ŭ turemnaj robie ŭ SIZA, a ŭ pamiaškańni hatela «Jeŭropa» ŭ centry Minska. Status Ziankoviča zastavaŭsia niezrazumiełym.

Juraś Ziankovič u studzieni 2025 hoda

Kamientary da artykuła