Падводныя археолагі знайшлі ў Сенненскім раёне артэфакты III тысячагоддзя да нашай эры
Спецыяльная навукова-даследчая група падводнай археалогіі Інстытута гісторыі Нацыянальнай акадэміі навук Беларусі пачала палявыя даследаванні ў Сенненскім раёне. Археолагі вывучаюць падводныя культурныя напластаванні на тарфянікавым паселішчы позняга неаліту Крывіна-3, піша БелТА.
Фота: Інстытут гісторыі НАНБ
У экспедыцыі ўдзельнічаюць супрацоўнікі аддзелаў археалогіі першабытнага грамадства, Сярэднявечча і Новага часу. Іх задача — даследаваць старажытнае паселішча, значная частка якога цяпер знаходзіцца пад вадой.
Нягледзячы на няпростыя ўмовы надвор'я, работы ідуць у адпаведнасці з планам. Ужо ў першыя дні даследаванняў археолагам удалося зрабіць некалькі цікавых знаходак. Сярод іх — фрагменты керамічнага посуду, вушка касцяной падвескі, а таксама косткі жывёл і рыб.
Фота: Інстытут гісторыі НАНБ
Паводле папярэдняй ацэнкі спецыялістаў, усе выяўленыя артэфакты адносяцца да другой паловы III тысячагоддзя да нашай эры. Гэтыя знаходкі могуць дапамагчы навукоўцам лепш зразумець побыт, гаспадарку і матэрыяльную культуру людзей, якія жылі на тэрыторыі сучаснай Беларусі ў эпоху позняга неаліту.
Чытайце таксама:
На гарадзішчы пад Карэлічамі знайшлі рэшткі абарончай сцяны XVI стагоддзя
У Вілейскім раёне адкапалі сляды ўзброенага канфлікту сярэдзіны І тысячагоддзя