Пуціну далажылі пра ўзяцце Купянска. Вось чаму гэта не так

20 лістапада начальнік расійскага Генштаба Валерый Герасімаў далажыў прэзідэнту Расіі Уладзіміру Пуціну пра ўзяцце расійскімі вайскоўцамі ўкраінскага горада Купянск. Аднак гэта адмаўляюць не толькі ўкраінскія вайскоўцы — да яго заявы скептычна паставіліся нават расійскія блогеры, якія падтрымліваюць вайну, піша Бі-бі-сі.

Уладзімір Пуцін і Валерый Герасімаў. Фота: Getty Image

«Злучэнні групоўкі «Захад» вызвалілі горад Купянск і працягваюць знішчэнне фармаванняў Узброеных сіл Украіны, акружаных на левым беразе ракі Аскол», — далажыў Герасімаў прэзідэнту Расіі Уладзіміру Пуціну ў чацвер, перадае «Інтэрфакс».

У сваю чаргу, камандуючы групоўкай войскаў «Захад» Сяргей Кузаўлёў заявіў, што пасля пераходу пад расійскі кантроль Купянска ў ім яшчэ засталіся асобныя разрозненыя групы ўкраінскіх вайскоўцаў.

«Горад знаходзіцца пад нашым кантролем, знішчаюцца асобныя дробныя разрозненыя групы праціўніка», — паведаміў Кузаўлёў Пуціну.

Ён таксама заявіў, што расійскія вайскоўцы не дапусцілі прарыву ўкраінскіх сіл з кола акружэння ў Купянску.

«Праціўнік неаднаразова рабіў спробы дэблакаваць акружаную групоўку, аднавіць пераправы праз раку Аскол, а таксама спрабаваў вырвацца з кальца акружэння. Усе контратакі адбітыя, прарыву ўкраінскіх фармаванняў з акружэння не дапушчана», — паведаміў камандуючы.

21 лістапада заяву Герасімава пракаментавалі ў групоўцы Аб'яднаных сіл УСУ. Там адмаўляюць расійскі кантроль над Купянскам.

«Стаўшы закладнікамі ўласнай хлусні, расійскія кіраўнікі вымушаныя нарошчваць яе градус. У горадзе Купянск групы расіян, рассяроджаныя ў паўночных раёнах горада, налічваюць каля 40 чалавек, пакуль яшчэ здольных падаваць голас. Пасёлак Купянск-Вузлавы знаходзіцца пад кантролем Сіл абароны Украіны», — гаворыцца ў заяве.

«Асобна адзначым, што яго плошча ў 4 квадратныя кіламетры робіць немагчымым не толькі акружыць там такую колькасць падраздзяленняў, але і проста размясціць», — дадалі ў групоўцы.

Украінскія вайскоўцы адмаўляюць страту Купянска. Фота: Getty Image

У той жа час заяву Герасімава аб узяцці пад кантроль Купянска аcпрэчваюць не толькі ўкраінскія вайскоўцы — да яе скептычна паставіліся і расійскія блогеры, якія падтрымліваюць вайну, піша вайсковы аглядальнік Бі-бі-сі Павел Аксёнаў.

«Заява Герасімава аб поўным вызваленні Купянска пакуль не праілюстраваная кадрамі аб'ектыўнага кантролю», — прыводзіць ён каментар расійскага праваеннага тэлеграм-канала «Два майора».

«Военный информатор» назваў даклад Герасімава Пуціну «яздой наперадзе паравоза», а «Канал визионера» напісаў, што «заявы НГШ пра поўнае вызваленне Купянска […] выклікаюць, мякка кажучы, шок».

Яшчэ 19 лістапада сцвярджэнне аб узяцці Купянска называў «ашуканствам» блізкі да Мінабароны Расіі канал «Рыбарь».

Гэта не першы раз, калі паведамленні расійскага вайсковага камандавання не пацвярджаюцца паведамленнямі з месцаў, прычым такое здаралася менавіта ў дачыненні Купянска. У канцы жніўня, падводзячы вынікі вяснова-летняй кампаніі, Герасімаў заявіў, што палову горада ўжо захапілі.

Дзякуючы перавазе ў жывой сіле — асноўнаму фактару поспеху на вайне — расійская армія прасоўваецца адразу на некалькіх кірунках — напрыклад, у Пакроўску і ваколіцы Гуляйполя. Аднак, прасоўванне гэта не вельмі хуткае, адзначае Аксёнаў.

Войскі вымушаныя выкарыстоўваць тактыку праточвання праз няшчыльную, часта ачаговую абарону невялікімі групамі, а ўкраінцы ўтрымліваюць пазіцыі, нават знаходзячыся ў цяжкім становішчы.

Каментары да артыкула