Анатоль Котаў адплыў з Трабзона ў Сочы на яхце

Зніклы тыдзень таму беларускі апазіцыйны актывіст Анатоль Котаў паплыў з Трабзона на прыватнай яхце ў Сочы, паведаміла крыніца стамбульскага бюро Deutsche Welle ў трабзонскай паліцыі. 

Анатоль Котаў

Суразмоўца DW пацвердзіў, што Котаў пакінуў Трабзон 21 жніўня, гэта значыць у дзень свайго прылёту ў Турцыю, і адправіўся ў Сочы на прыватнай яхце.

Ні ў Котава, ні ў людзей, якія суправаджалі яго, не было ніякіх юрыдычных праблем, напрыклад, пытанняў з дакументамі, «нішто не выглядала падазроным», удакладніла крыніца DW, таму ў турэцкай паліцыі няма прычын для расследавання.

Колькі было людзей, якія суправаджалі Котава, і хто яны, ён удакладніць не змог. Паводле непацверджаных звестак, яхта ўжо чакала Котава, калі ён прыбыў са Стамбула ў Трабзон.

Як раней даведалася DW, з порта Трабзон няма рэгулярных паромных зносін. Адтуль выходзяць грузавыя і рыбалоўныя судны, круізныя караблі і прыватныя лодкі.

45-гадовы Анатоль Котаў, былы беларускі чыноўнік, прыляцеў 21 жніўня раніцай у Стамбул, у 12:26 паводле польскага часу напісаў жонцы і перастаў выходзіць на сувязь у 21:28. З тых часоў пра яго нічога не вядома. Сваякі падавалі заяву аб знікненні ў паліцыю Турцыі.

Каментары да артыкула