Pad Rahačovam šeść karoŭ unačy źbiehli ź fiermy i zahinuli

U Rahačoŭskim rajonie šeść karoŭ zahinuli paśla načnych uciokaŭ ź fiermy. Pra zdareńnie, jakoje adbyłosia jašče 11 maja, raskazali ŭ prakuratury Homielskaj vobłaści.

Zdymak ilustracyjny. Fota: «Naša Niva»

Nočču žyvioły paškodzili mietaličnuju pieraharodku ŭ chlavie, paśla parvali viaroŭku, jakoj była zamacavanaja złamanaja pałavinka varot, a zatym vyłamali druhija dźviery i vybralisia na terytoryju fiermy. Ranicaj vieterynary znajšli karoŭ miortvymi. Pobač ź imi znachodzilisia reštki fosfarnych uhnajeńniaŭ.

Vyśvietliłasia, što viasnoj na fiermie z parušeńniami zachoŭvalisia azotnyja, fosfarnyja i kalijnyja ŭhnajeńni. Paśla taho jak asnoŭnuju častku ŭhnajeńniaŭ pieranieśli, ich reštki naležnym čynam nie prybrali — jany zastalisia na ziamli i travie. Takim čynam, žyvioły atrymali dostup da niebiaśpiečnych rečyvaŭ.

U prakuratury adznačyli, što vykanaŭčy dyrektar, vartaŭnik i zaatechnik nienaležnym čynam vykonvali svaje słužbovyja abaviazki.

U intaresach sielskahaspadarčaha pradpryjemstva byŭ padadzieny pazoŭ. Sud zadavoliŭ jaho i pastanaviŭ spahnać bolš za 24,6 tysiačy rubloŭ z dvuch vinavatych rabotnikaŭ sielhaspradpryjemstva i kiroŭnaj arhanizacyi. Sudovaje rašeńnie ŭžo ŭstupiła ŭ zakonnuju siłu.

Kamientary da artykuła