Miesca, dzie pačynaŭsia stary Miensk, buduć zabudoŭvać. Užo jość płan

Minski rajonny vykanaŭčy kamitet vynies na hramadskaje abmierkavańnie horadabudaŭničy prajekt raźvićcia viosak Haradzišča i Novaja Vioska. Hetaje miesca ličycca kałyskaj biełaruskaj stalicy, bo mienavita tut na race Miency znachodzicca staražytnaje haradzišča X stahodździa, piša domovita.by.

Praz archieałahičnuju kaštoŭnaść ziamli architektary całkam admovilisia ad budaŭnictva šmatpaviarchovikaŭ na karyść pryvatnaha siektara. Da 2040 hoda na terytoryi viosak sfarmujuć małapaviarchovaje asiarodździe sa skvierami, vizit-centram i novymi darohami. Pad pryvatnuju zabudovu ŭžo vydzielili dadatkovyja hiektary byłych kałhasnych paloŭ. 

Fota: «Płanieta Biełaruś»

Achova staražytnych vałoŭ i prazrystyja aharodžy

Haradzišča na pravym bierazie raki Mienki maje status historyka-kulturnaj kaštoŭnaści druhoj katehoryi, što surjozna paŭpłyvała na hienieralny płan. Architektary zachavajuć histaryčnuju trasiroŭku vulic Zarečnaj, Dziaržynskaha i Pijanierskaj, jakaja skłałasia ŭ kancy XVIII stahodździa. Pad achovu traplajuć staradaŭnija mahiły ŭładalnikaŭ miascovaha majontka Rudolfa i Safii Piščałaŭ, a taksama mohiłki kala Mikałajeŭskaj carkvy. Luboje novaje budaŭnictva tut žorstka rehłamientavana, kab nie parušać upryniaćcie staražytnych ziemlanych vałoŭ.

Abmiežavańni zakranuć źniešni vyhlad pryvatnych uładańniaŭ u histaryčnym centry vioski. Aŭtary prajekta prapisali patrabavańnie stavić z boku vulic vyklučna prazrystyja aharodžy vyšynioj nie bolš za paŭtara mietra. Novyja hramadskija budynki nie buduć pieravyšać troch pavierchaŭ z mansardaj. Na ŭčastkach, kudy nie daciahnucca pažarnyja drabiny ratavalnikaŭ, vyšynia žyłych pabudoŭ abmiežavanaja 10 mietrami.

Krynica: Travel34

Nijakich panelek i dźvieście novych siadzib

Pavodle prajekta ŭ Haradziščy i Novaj Vioscy znos najaŭnych žyłych damoŭ nie praduhledžany, a budaŭnictva novaha žylla płanujecca tolki na svabodnych terytoryjach. Dla pašyreńnia vioski ź sielskahaspadarčaha abaračeńnia zabiaruć 32,4 hiektara vornych ziamiel sielhaspradpryjemstvaŭ «Ždanovičy» i «Ščomyślica». Na hetych učastkach źjavicca vyklučna nizkaščylnaja siadzibnaja i błakavanaja zabudova — šmatpaviarchovikaŭ tut nie budzie.

Na novych ziemlach da 2040 hoda ŭźviaduć 224 katedžy ahulnaj płoščaj trochi bolš za 25 tysiač kvadratnych mietraŭ. Siaredni pamier nadziełu pad dom składzie 15 sotak, a płošča samoha žytła — kala 110 kvadrataŭ. Pieršyja 75 katedžaŭ płanujecca zdać da 2030 hoda na pieršym etapie asvajeńnia terytoryi. Paśla hetaha kolkaść nasielnictva abjadnanych viosak Haradzišča i Novaja Vioska vyraście ź ciapierašnich 628 da 810 čałaviek.

Vyjava zhienieravanaja z dapamohaj ŠI

Vizit-centr, skvier kala sažałki i novaja daroha

Kab raskryć turystyčny patencyjał kałyski Minska, na vulicy Dziaržynskaha pabudujuć šmatfunkcyjanalny vizit-centr dla haściej archieałahičnaha kompleksu. Pobač ź im adkryjucca kulturna-adpačynkavy centr na 75 miescaŭ, kafe na 40 miescaŭ i kramy płoščaj 250 kvadratnych mietraŭ. Dla aktyŭnaha adpačynku žycharoŭ pabudujuć adkrytuju spartyŭnuju placoŭku i placoŭki bytavych servisaŭ. Asobnych škoł budavać nie stanuć, ale dla dziaciej arhanizujuć biaspłatny padvoz aŭtobusami ŭ ahraharadok Aziarco i stalicu.

U paŭnočna-ŭschodniaj častcy Haradzišča abstalujuć skvier z sažałkaj, a za chramam Śviaciciela Mikałaja Cudatvorca razabjuć nievialikuju zialonuju zonu. Uzdoŭž rečyšča raki Mienki źjavicca vialiki pryrodny łuhapark z prahułačnymi darožkami i miescami dla adpačynku kala vady.

Transpartnuju sietku taksama čakaje abnaŭleńnie: u bok vioski Stročycy pabudujuć darohu z pramym vyjezdam na bresckuju trasu R-1. Najaŭnyja vulicy Višniovuju, Majskuju i Mahistralnuju rekanstrujujuć, a ŭzdoŭž prajezdaŭ prakładuć vieładarožki. Dla turystaŭ i naviedvalnikaŭ vizit-centra abstalujuć parkoŭku na 35 mašyna-miescaŭ. Taksama ŭ viosku praciahnuć centralny vadapravod sa stancyjami abiezžalezvańnia i chutkasny internet.

Hramadskaje abmierkavańnie projdzie z 3 pa 17 žniŭnia, a ŭbačyć ekspazicyju architekturna-płanavalnaj kancepcyi možna ŭ budynku Ščomyślickaha sielskaha vykanaŭčaha kamiteta ŭ ahraharadku Ščomyślica.

Sama prezientacyja prajekta projdzie 12 žniŭnia.

Kamientary da artykuła