«Za hod možna zarabić na kvateru ŭ Minsku». Biełaruska raskazała, jak pajechała pracavać u horad budučyni

Kaciaryna nie płanavała pierajazdžać na Blizki Uschod, navat u padarožžy tam ni razu nie była. Ale raptam u Tinder zamiest zaprašeńnia na čarhovaje spatkańnie atrymała prapanovu pa pracy. Tak jana niečakana dla samoj siabie apynułasia ŭ Saudaŭskaj Aravii, u horadzie budučyni pasiarod pustyni, piša «Anłajnier».

«U dziacinstvie ja žyła ŭ zakrytym haradku ŭ Nihieryi»

Znajomstva z historyjaj Kaciaryny pačali krychu zdalok. U 2021 hodzie jana tolki viarnułasia ŭ amierykanskuju IT-kampaniju z dekretu — pracavała tam HR, źbirała kamandu. Mianiać ničoha nie źbirałasia: dobraja praca i kamfortnaje žyćcio ŭ Biełarusi jaje całkam zadavalniali. Ale ŭmiašalisia asabistyja abstaviny: Kacia z mužam vyrašyli raźvieścisia. Ź ciaham času dziaŭčyna stała hatovaja «vyjści na śviet virtualnych znajomstvaŭ».

«Litaralna na pieršym spatkańni ja atrymała džob-ofier. Viedajucie, hetyja standartnyja razmovy, chto čym zajmajecca. Ja raskazvaju, što pracuju HR, i mnie tut ža pastupaje prapanova kahości zachancić. Na druhim spatkańni toje samaje. Tam u mužčyny byŭ zapyt na pavyšeńnie zarabotnaj płaty. Ja jaho prakačała, dała parady, i praz čas ad jaho prychodzić paviedamleńnie: «Pryjaciel, pryšli svajo reziume». Tut u mianie ŭ pamiaci ŭspłyła infarmacyja, što jon pracuje ŭ Saudaŭskaj Aravii na vialikim prajekcie. Ja padumała: čamu b i nie? Moj dośvied akazaŭsia relevantnym, mnie pryznačyli sumoŭje — i adrazu paśla jaho byli hatovyja adarvać z rukami i nahami».

Na toj momant ni pra jaki pierajezd havorki nie išło, novaja sprava stała dla Kaci cikavaj padpracoŭkaj. Ale litaralna ŭ adzin dzień jana straciła asnoŭnuju pracu — i pryniać zaprašeńnie pajechać u Saudaŭskuju Araviju zdałosia całkam łahičnym rašeńniem.

«Da hetaha ja nikoli nie była ŭ toj častcy śvietu, navat u Dubaj nie jeździła. Ale ŭ dziacinstvie razam z baćkami ja žyła ŭ Nihieryi. Moj tata — enierhietyk, my siamjoj pajechali za im, i prykładna ŭ takim uzroście, jak maje dzieci, ja žyła ŭ zakrytym haradku».

Ciapier narešcie možna daviedacca, kudy amal za 6 tysiač kiłamietraŭ adpraviłasia Kacia ŭžo ŭ asensavanym uzroście. Jana pajechała pracavać na ambicyjnym prajekcie «Nieom». Heta futurystyčny miehaprajekt, jaki ŭ 2017 hodzie pačali stvarać na bierazie Čyrvonaha mora ŭ Saudaŭskaj Aravii. Jaho metaj było dakazać, što kraina žyvie nie tolki naftaj. Na prajekt zakłali biudžet prykładna $500 miljardaŭ.

Najbolš viadomaj častkaj «Nieomu» pavinien byŭ stać horad «Linija»: dva vielizarnyja chmaračosy daŭžynioj 170 kiłamietraŭ i vyšynioj 500 mietraŭ. Pa prajekcie heta horad, u jakim nie budzie nivodnaj mašyny, — najbolš ekałahičny ŭ śviecie.

Ale heta jašče nie ŭsio. Taksama źbiralisia pabudavać płavajučy pramysłovy horad, harnałyžny kurort z mahčymaściu katacca kruhły hod pasiaredzinie pustyni i elitny astraŭny kurort kłasa luks. U hetym hodzie prajekt značna źmianili ŭ bok spraščeńnia.

Sindała — luksavy kurort, pieršy adkryty prajekt «Nieoma»

Ale na 2021 hod prypaŭ najbolšy pik jaho rostu. Kamanda maštabavałasia litaralna kožny dzień — u pracy Kaciaryny było dzie razharnucca.

Spačatku jana była adzinaj biełaruskaj siarod usich supracoŭnikaŭ, paźniej dałučyŭsia jašče adzin chłopiec. Aformić dakumienty — kvest z mnostvam zoračak, sistema atrymańnia viz — adna z najbolš biurakratyzavanych u śviecie. Naprykład, na toje, kab pieravieźci dziaciej, u Kaci pajšło amal paŭhoda. Ale byli ŭ jaje praktycy kiejsy, kali ŭvieś praces pierajezdu zajmaŭ i ceły hod.

«Bankaŭskaje adździaleńnie całkam zakryli, kab zrabić mnie kartku»

U novuju dla siabie krainu Kacia pierabrałasia adna z dvuma dziećmi — starejšamu synu było 8, małodšamu — usiaho 2. Uskładniała situacyju toje, što ŭ Kacinaha starejšaha dziciaci aŭtyzm.

«Kali ja kažu, što žyła ŭ Saudaŭskaj Aravii, mnohija ŭjaŭlajuć sabie niešta nakštałt Dubaja, z łakšery-ŭmovami i chmaračosami. A ja litaralna znachodziłasia ŭ pustyni ŭ zakrytym pasieliščy. Ź ludźmi, ź jakimi ty pracuješ, ty razam jasi, žyvieš pobač i pravodziš volny čas».

Kacia raskazvaje, što ŭ «Nieomie» na toj momant pracavała kala 4 tysiač čałaviek, ź ich 80% — ekspaty. Atrymałasia sapraŭdnaja kraina ŭ krainie. Saŭdzity, jakija traplali ŭ kamandu, byli ź miascovaj elity, bolšaść vučylisia za miažoj, tamu da ładu žyćcia zamiežnikaŭ stavilisia z razumieńniem. A voś žychary bližejšych haradkoŭ kožny raz reahavali na pryjezdžych ź vialikim ździŭleńniem.

«U mianie byŭ šok, kali ja pryjechała adkryvać bankaŭski rachunak. Supracoŭniki banka prosta začynili dźviery znutry, kab miascovyja žychary nie mahli zajści, pakul jany raźbiralisia z majoj kartkaj. U ich da pryjezdžych žančyn asablivaje staŭleńnie. Jość takija restarany, jakija, kali pryjdzie žančyna, hatovyja buduć zakryć dla jaje cełuju zału. Kali pavažać kulturu, tam supierbiaśpiečna.

Takoha pavažnaha staŭleńnia z boku kaleh, jak ad saŭdzitaŭ, ja nie bačyła ni ad kaho, a dośvied u mianie vialiki. Kali ekspat ź Jeŭropy całkam moža nakryčać abo prajavić hrubaść, to saŭdyt nikoli ŭ žyćci nie dazvolić sabie padniać hołas na kalehu-žančynu. Kali nie daj boh chtości takoje ŭbačyć, jaho adrazu ž zaniasuć u «čorny śpis». Tam vielmi pa-trapiatkomu i pry hetym prafiesijna staviacca da žančyn. Naohuł, u Saudaŭskaj Aravii zaraz pik žanočaha ruchu, ich padtrymlivajuć i prasoŭvajuć. Mieć u štacie žančyn z Saudaŭskaj Aravii — heta supierprestyžna».

Naohuł miascovaja karparatyŭnaja kultura ŭraziła surazmoŭcu.

«Ščyra kažučy, kali ja tolki pačała pracavać dystancyjna, u mianie byŭ kulturny šok. Ja ŭvohule nie razumieła, jak uładkavany karparatyŭny śviet u Saudaŭskaj Aravii. U mianie byli bosy ŭ Izraili, u Amierycy, u Hiermanii — usiudy svaje tradycyi. Ale jość praviły: ty dasyłaješ imejł, i tabie pavinny adkazać na praciahu 24‑48 hadzin. A tam ty dasyłaješ imejł, i tabie nie adkazvajuć tydzień, dva… Ty adpraŭlaješ jašče dziesiać — i cišynia. Kali pracuješ dystancyjna, heta prosta zabivaje. Ty nie razumieješ, što adbyvajecca.

Vystava The Line

I tolki kali ja pryjechała tudy i asabista paznajomiłasia ź ludźmi, ź jakimi pierapisvałasia, ja ŭsio zrazumieła. Dla vyrašeńnia pytańniaŭ treba pryjści, pahavaryć, vypić razam čaju. Vielmi šmat zaviazana na asabistych kantaktach. Kali ty dla ich niejki nieviadomy čałaviek, jany buduć ciabie ihnaravać. Uličvajučy, što ŭ kožnaha ŭ skryni pa 600 listoŭ, kali jany ciabie nie viedajuć, ničoha nie adbudziecca. Darečy, saŭdzity vielmi lubiać pracavać sa słavianami. Na dziva ŭ nas padobny kulturny kod.

U kamandzie navat źjaviłasia vyražeńnie «Kiejt-medžyk»: usie ździŭlalisia, jak mnie ŭdavałasia vyrašać prablemy. A ja, jakaja b śpioka ni była, prosta išła ŭ susiedni ofis, dzie siadziać ludzi, jakija prymajuć rašeńni, i razmaŭlała ź imi asabista. Jašče zaŭsiody ratavali biełaruski ziefir i biełaruskija šakaładki. Nie było jašče nivodnaj prablemy, jakuju nie vyrašyli b biełaruskija prysmaki», — śmiajecca Kacia.

«Nakopić za hod na kvateru ŭ Minsku — zaprosta»

Pa słovach surazmoŭcy, płacili ŭ «Nieomie» cudoŭna: treba ž było niejak zavabić vysokakłasnych śpiecyjalistaŭ u pustyniu. Naźbirać za hod na kvateru ŭ Minsku možna było vielmi prosta. Akramia zarobku, praduhledžanaja sistema bonusaŭ i nakapleńniaŭ.

Kacia pracavała ŭ prajekcie, jaki zajmaŭsia ježaj: vyroščvali ŭ ciaplicach ahurki, tamaty, sałatu i rybu ŭ Čyrvonym mory. Plus było padraździaleńnie, jakoje zajmałasia raślinnym białkom. A jašče śpiecyjalisty pracavali nad sistemaj indyvidualnaha charčavańnia z ulikam hienomu i asabistych patreb.

«Znajści śpiecyjalistaŭ, jakija majuć dośvied vyroščvańnia takich ža tamataŭ u pustyni z ulikam novych technałohij, vielmi składana. Ich nasamreč mała. A tyja, u kaho jość taki dośvied, užo žyvuć u vielmi dobrych umovach, ich dzieci chodziać u dobryja škoły. Zavabić ich u pustyniu, prymusić całkam pamianiać ład žyćcia było nievierahodna ciažkaj zadačaj. Dobra kali ty adzin pryjazdžaješ, a kali ź siamjoj…

Mnohija bačyli roliki pra «Nieom» i byli ŭpeŭnienyja, što ŭsio ŭžo pabudavana. Pryjazdžali na sumoŭje — a vakoł tolki pustynia. Zdarajecca razryŭ šabłonu. Treba było padniać usio z samaha pačatku. Nie było ni vady, ni padvodu elektryčnaści, ni internetu — usio z nula. Svojesablivy čelendž.

Łahier dla navičkoŭ

Ty nie prosta idzieš na novuju pracu — ty całkam mianiaješ svajo žyćcio. Ludzi, jakija pryjazdžali ź jeŭrapiejskich krain, vielmi ciažka ŭbudoŭvalisia ŭ hety kampaŭnd — maleńkuju viosačku, dzie niama nijakich umoŭ: niama supiermarkietaŭ, restaranaŭ, nijakaha zvykłaha žyćcia«.

Pa słovach Kaci, asnoŭnaja katehoryja supracoŭnikaŭ — ramantyki, jakija hareli idejaj źmianić śviet. Naprykład, jaje načalnik maryŭ usich nakarmić. Maŭlaŭ, kali ty možaš vyraścić ježu ŭ pustyni, to, jakija b kataklizmy ni zdaryłasia, čałaviectva vyžyvie.

Ale, niahledziačy na vielizarnyja ŭkładzienyja namahańni, miehaprajekt akazaŭsia zanadta ambicyjnym. Niekatoryja kirunki prosta zakryvalisia.

«Ujavicie: vy pracujecie na miažy mahčymaściaŭ, układajecie dušu, čas, zdaroŭje, a vyniku tak nikoli i nie ŭbačycie. Amal nichto nie mieŭ dośviedu pracy ŭ nastolki maštabnych prajektach, tamu było niamała tupikovych halin raźvićcia. Mnie było praściej. Vyniki majoj pracy byli na pavierchni: ludzi pryjazdžali, kamanda rasła, z 8 čałaviek nas stała 100».

«Myć, prybirać, hatavać nie treba — tolki pracavać»

Pahavaryli i pra ŭmovy žyćcia pasiarod pustyni. Jak raskazvaje hierainia, dla rabotnikaŭ arhanizavana absalutna ŭsio: žyllo, ofis, charčavańnie, prybirańnie.

«Usio zroblena tak, kab ty pracavaŭ non-stop. Ty ŭvohule nikudy nie možaš vyjści, hruba kažučy. Vakoł pustynia, Čyrvonaje mora. Adzinaja zabaŭka, dzie ja praviała bolšuju častku volnaha času, — heta samalot. Kab nie źjechać z hłuzdu ŭ zakrytaj prastory, treba adtul vyjazdžać. Usie adzin adnaho viedajuć, kožny dzień ty bačyš adnych i tych ža ludziej. Ja trapiła na prajekt na piku, hrafik byŭ absalutna nienarmavany. Uvohule nie było miažy pamiž pracaj i domam, tamu što ty litaralna žyvieš na svajoj pracy. Psichałahična dla mianie heta było samym składanym».

Łahier dla navičkoŭ

Na terytoryi spačatku było dva łahiery, pryčym u samym pramym sensie: dvuchpaviarchovyja damki maksimalna nahadvali miescy adpačynku dla dziaciej.

«U łahiery dla navičkoŭ usie ŭzajemadziejničajuć vielmi ciesna. Ty čuješ, jak susiedzi chrapuć, chodziš ź imi ŭ ahulnuju stałovuju. U ciabie jość, pa sutnaści, tolki łožak, vanny pakoj, šafa i čajnik. A pryjazdžajuć vialikija imiony ŭ industryi, ludzi, jakija pryvykli da dobrych umoŭ u Jeŭropie abo Amierycy. Dla mnohich heta było sapraŭdnym čelendžam. Tym bolš što ŭ pieryjad bumu kamuści davodziłasia žyć tak i pa paŭhoda. Łahier nie paśpiavaŭ za rostam kolkaści rabotnikaŭ.

Stałovaja

U druhim łahiery znachodzilisia ofisy i bolš kamfortnaje žyllo — adnapaviarchovyja damki. Kali ty pryjazdžaješ adzin, u ciabie adzin pakoj: spalnia, tualet i maleńkaja kuchnia z haścioŭniaj, kali ź siamjoj, jak ja, — dźvie spalni, dva vannyja pakoi, kuchnia i haścioŭnia».

Kacia znoŭ padkreślivaje: usie ŭmovy zatočanyja na toje, kab ty moh uvieś čas addavać pracy. Dva razy na tydzień adzieńnie zabirajuć u pralniu. Ježa bieźlimitnaja, samomu hatavać nie treba.

Siamiejnyja damy

«Vybar ašałamlalny: krevietki, łobstary byli zvyčajnaj spravaj. Ja zaŭsiody papiaredžvała tych, chto płanuje pierajezd: nabrać 10 kiłahramaŭ — heta baza. Pa-pieršaje, na stresie ludzi bolš jaduć. Pa-druhoje, spakusa sapraŭdy vialikaja. Ježy vykidali vielmi šmat. Jałavičynu Vielinhton zabirali sabakam. Napoi bieźlimitnyja. Ale ź ciaham času ŭsio ž taki ŭviali sistemu kašalka: naličvali bały, jakimi možna było raźličvacca, kab choć niejak skaracić abjomy ježy».

Surazmoŭca ŭpeŭnienaja: dla siemjaŭ miesca idealnaje. U sacpakiet uvachodzić usio: i jaśli, i sad, i škoła. Navat kali dzieci zastajucca ŭ inšaj krainie, kampanija pakryvaje navučańnie. Samim supracoŭnicam možna choć na nastupny dzień paśla rodaŭ vychodzić na pracu: umovy ŭ jaślach praduhledžanyja dla niemaŭlat. U dziciačym sadku ŭ hrupie maksimum 15 dziaciej, a na ich try-čatyry niańki. Usio znosiny na anhlijskaj movie. Pa słovach Kaci, abodva jaje syny vydatna vyvučyli movu. Uziať niańku-filipinku dadomu z pražyvańniem taksama zusim niadoraha — $300-400. Tak što za pobyt sapraŭdy možna nie pieražyvać.

«Kali my viarnulisia ŭ Minsk, synu treba było prajści kamisiju, kab paćvierdzić aŭtyzm. I ŭ jaho pytajucca: «U ciabie jość siabry, jak ich zavuć?» Jon pačynaje pieraličvać: «Muchamied, Abdułaziz». Supracoŭniki pačali ŭśmichacca. Daviałosia rastłumačyć, što heta praŭda. U jaho jość siabry z usiaho śvietu — ad Słavakii da Aŭstralii. Heta sapraŭdy vopyt, jaki dzivosna pašyraje kruhahlad. Na prajekcie pracavali pradstaŭniki 107 krain. U nas było śviata «Parad nacyj», i vyhladała heta nievierahodna.

«Kampanija apłačvała supracoŭnikam dva pieraloty ŭ miesiac pa ŭsioj Saudaŭskaj Aravii»

Udakładnili: a čym možna zaniacca ŭ volny čas? Pieršaja dumka — heta spartzała. U kampanii chutka zrazumieli: čym chutčej raście kolkaść supracoŭnikaŭ, tym bolš treba trenažornych załaŭ. U dadatak pabudavali niekalki basiejnaŭ i džakuzi z asobnymi zonami dla mužčyn i žančyn.

Hałoŭnaja pryrodnaja zabava — Čyrvonaje mora. Kacia pryznajecca: najlepšy snorklinh u jaje žyćci byŭ mienavita tam. Ryby, čarapachi, karały — i ŭsio heta dastupna ŭ lubuju chvilinu, prosta sadzišsia ŭ mašynu i jedzieš na plaž. Ale na hetym «kulturnaja prahrama» u cełym zakančvajecca, asablivych zabavak niama.

Uličvajučy składanaść prajektu, dostup da jaho byŭ zakryty. Hości atrymlivajuć propuski, jakija paćviardžajucca na niekalkich uzroŭniach. Akramia taho, zdymać videa, raspaŭsiudžvać fatahrafii, vykładać ich u instahram zabaroniena. Navat u asabistym akaŭncie Kacia starałaś nie pakazvać komjunici: za heta mahli być sankcyi.

«Vychodzić za terytoryju, viadoma, možna — biez hetaha ty prosta źjedzieš z hłuzdu. Kožnyja druhija vychadnyja ja kudyści lotała — pobač ci krychu dalej, kab raźviejacca. Kampanija apłačvała supracoŭnikam «Nieoma» dva pieraloty ŭ miesiac pa ŭsioj Saudaŭskaj Aravii. Adpačynkaŭ tam šmat, asabliva paśla Ramadanu. Usie pačynajuć adpačyvać, i, kudy b ty ni pajechaŭ — u Indyju, na Šry-Łanku, — usiudy sustrenieš kahości z prajekta. Heta adziny čas u hodzie, kali jany sapraŭdy nie pracujuć. Tamu što, kali biareš adpačynak uletku, ty ŭsio adno pracuješ anłajn, zaŭsiody na suviazi. A voś relihijnyja śviaty — adziny tydzień, kali možna vyklučyć telefon i adpačyć».

Nie zmahli nie spytać: nakolki doraha ŭ samoj krainie?

«Tyja ž kava i burhier u Saudaŭskaj Aravii i ŭ nas mohuć kaštavać prykładna adnolkava, a časam u nas navat daražej. U Saudzii kult ježy, šmat łakšery-ŭstanoŭ z bahataj kuchniaj. Zrazumieła, što tam užo ŭ razy daražej. Ale pry žadańni možna pajeści i za dalar. U Saudaŭskaj Aravii mocna adčuvajecca ŭpłyŭ amierykanskaj kultury, šmat fastfudu.

Kali chočaš kuplać dobryja pradukty — tamaty, jakija pachnuć tamatami, nie płastykavuju kłubnicu, — heta budzie kaštavać vielmi doraha. U krainie amal ničoha nie vyroščvajuć, usio impartujuć: morkvu — z Aŭstralii, bulbu — ź Jehipta, niešta — ź Jeŭropy. Ale pry žadańni možna znajści što zaŭhodna — pytańnie cany. Hrečka, naprykład, $10 za 500 hram.

Žyćcio ŭ kamjunici

Najbolš ścipły numar u hateli ŭ stalicy Er-Ryjadzie budzie kaštavać $300. Heta zvyčajny sietkavy hatel. Jość, viadoma, haścinicy, dzie žyvuć pryjezdžyja indyjcy i pakistancy, ale ja b nie raiła zasialacca tudy žančynie adnoj. Darečy, žyć u adnym numary niežanatym param nielha, asabliva ŭ prostych hatelach. Zdarajucca navat abłavy. Zapluščyć na heta vočy mohuć chiba što ŭ vielmi darahich sietkach».

Ale važkija padstavy adpravicca ŭ takuju mini-pajezdku źjaŭlajucca. Naprykład, u Kaci tak zbyłasia mara: jana ŭpieršyniu ŭ žyćci trapiła na kancert Metallica. Z kožnym hodam takich maštabnych kulturnych padziej stanovicca ŭsio bolš. Miascovyja abažajuć parki zabavak — zrazumieła, u asnoŭnym krytyja.

Er-Ryjad

«Tempieratura letam dasiahała +54»

Klimat u Saudaŭskaj Aravii — jašče adno vyprabavańnie na tryvałaść.

«Tam, dzie my žyli, pobač Čyrvonaje mora, tamu krychu lahčej. Choć letam tempieratura vady takaja, što zdajecca, byccam płavaješ u supie. Tam niama takoj zasušlivaj śpioki, jak u Er-Ryjadzie, dzie letam moža być 50‑60 hradusaŭ. U nas maksimum — 52-54. Navat da hetaha možna pryzvyčaicca! I ŭsio ž taki letam davoli ciažka, asabliva dzieciam. Sto mietraŭ składana prajści pa vulicy, usie starajucca pieramiaščaca tolki na transparcie — ad kandycyjaniera ŭ ofisie da kandycyjaniera ŭ mašynie».

Jak z takim nadvorjem prytrymlivacca ŭschodnich tradycyj? Tak jak «Nieom» — heta dziaržava ŭ dziaržavie, na samoj terytoryi možna chadzić adnosna svabodna: padletki nosiać šorty i topiki. Ale Kaciaryna, jakaja pracuje ź miascovymi, zaŭsiody adziavałasia zakryta: doŭhaja sukienka, łokci i plečy abaviazkova pad tkaninaj. Jak tolki vychodziš za varoty — u aeraport, u najbližejšy horad pa biurakratyčnych spravach, — abaviazkova treba zakryvacca całkam: miascovyja žychary ŭ hetym rehijonie nie razbeščanyja turystami.

Nazirałasia i peŭnaja «fizičnaja» dystancyja ŭ znosinach. Nielha dakranaccca da saudaŭskich kalehaŭ, žančynam nielha paciskać ruku.

Zakrytyja viečarynki ŭ pustyni

 — Kultura sapraŭdy źmiašanaja. Z adnaho boku, prahresiŭny ŭzrovień «Nieoma», z druhoha — hłybokaja pavaha da tradycyj. Mnohija dumajuć: «My tut takija sučasnyja, nichto nie zaŭvažyć». Ale saudzity vielmi raŭniva staviacca da svajoj kultury. Navat kali niama žorstkich aficyjnych patrabavańniaŭ, pažadana viedać praviły i pavodzić siabie vielmi pavažliva. Naprykład, u Ramadan mianiajecca rasparadak dnia. Dla ekspataŭ śniadanak i abied jość, ale ŭ ofisie pić vadu abo kavu zabaroniena: heta vialikaja niepavaha.

— A možna siabravać abo zavodzić adnosiny na pracy?

— Pieršaje adčuvańnie — heta musulmanskaja kraina, dzie lubyja adnosiny pa-za šlubam karajucca zakonami. Ale zaraz idzie libieralizacyja: miascovyja ŭžo pačynajuć sustrakacca biez dazvołu baćkoŭ. Tym nie mienš u karparatyŭnaj kultury, tym bolš u maleńkim kampaktnym kampaŭndzie, reputacyja idzie napieradzie ciabie. Za taboj nazirajuć. Tamu asabistaje žyćcio — za miežami kampaŭnda, lepš u inšym horadzie, a to i ŭ inšaj krainje.

Darečy, mienavita tak Kacia paznajomiłasia sa svaim budučym mužam. Jon pryjechaŭ na pracu ŭ Saudaŭskuju Araviju z Ałžyra 20 hadoŭ tamu, pracuje ŭ samaj vialikaj kampanii sotavaj suviazi, nie na «Nieomie». Sustrelisia jany ŭ dadatku dla znajomstvaŭ. Viasielle zhulali ŭ Hruzii.

«Muž žyvie ŭ Er-Ryjadzie. A mnie paśla piaci hadoŭ vyjezdaŭ, samalotaŭ, padarožžaŭ tak dobra doma. Ciapier u mianie taki pieryjad, što ja nie vieru ŭ work-life balance — jaho nie isnuje. Jość pieryjady: u pryjarytecie abo karjera, abo siamja. Zaraz u mianie siamiejny pieryjad (u Biełaruś Kacia viarnułasia padčas ciažarnaści trecim dziciem. — Zaŭvaha «Anłajniera»), ja chaču atrymać asałodu ad maciarynstva. Dzie my budziem žyć razam z mužam, ja nie zahadvaju. Sa svaim dośviedam ja viedaju, što vyžyvu dzie zaŭhodna. Ale zaraz mnie vielmi kłasna tut, u Biełarusi.

Kali ja źjazdžała, mnohija krucili kala skroni: «Kudy ty jedzieš z dvuma dziećmi ŭ pustyniu, da saŭdzitaŭ?» Ale azart, umieńnie ryzykavać i być u patrebnym miescy ŭ patrebny čas, mnie zdajecca, stanuć hałoŭnymi navykami najbližejšych hadoŭ. Spadziajusia, maja historyja kahości natchnić. Mnie 40 hadoŭ — i žyćcio pačynajecca znoŭku».

Kamientary da artykuła