ZŠA nie stali padaŭžać pasłableńni naftavych sankcyj suprać Rasii

Stała viadoma, što časovy dazvoł ZŠA, jaki dazvalaje prodaž rasijskaj nafty, jakaja ŭžo znachodzicca ŭ mory, skončyŭsia i nie budzie praciahnuty. Pra heta paviedamlaje ahienctva Reuters sa spasyłkaj na nienazvanyja krynicy ŭ administracyi ZŠA.

Zdymak ilustracyjny. Fota: Stringer/Anadolu via Getty Images

Raniej abmiežavańni na kampanii «Łukojł» i «Rasnafta» byli časova źniatyja 12 sakavika, kab strymać rost cen na naftu i haz z-za napružanaści vakoł Armuzskaha praliva. Pasłableńnie dazvalała pradavać rasijskuju naftu, jakaja ŭžo była zahružanaja ŭ tankiery.

Paźniej anałahičnaje pasłableńnie ŭviali i dla iranskaj nafty, ale, pavodle apošniaj infarmacyi, jaho taksama nie płanujuć praciahvać paśla zakančeńnia terminu.

Rašeńnie nie praciahvać hetyja miery źviazana z krytykaj unutry ZŠA. Pradstaŭniki abiedźviuch palityčnych partyj vystupili suprać źmiakčeńnia sankcyj u adnosinach da Rasii i Irana na fonie taho, što ZŠA i Izrail znachodziacca ŭ kanflikcie ź Iranam, a Rasija praciahvaje vajnu suprać Ukrainy.

Takim čynam, paśla zakančeńnia dazvołu sankcyjny cisk na naftavy siektar Rasii i Irana znoŭ uzmacniajecca.

U toj ža čas Ministerstva finansaŭ ZŠA vydała papiaredžańnie dla šerahu bankaŭ z Amana, AAE i Kitaja z pahrozaj uvieści druhasnyja sankcyi za praciah pracy ź Iranam:

«Minfin ZŠA dziejničaje ahresiŭna ŭ miežach palityki «Ekanamičnaja jaraść», zachoŭvajučy maksimalny cisk na Iran.

Finansavyja ŭstanovy pavinny ŭśviedamlać, što viedamstva vykarystoŭvaje ŭvieś śpiektr dastupnych instrumientaŭ i paŭnamoctvaŭ i hatova ŭvodzić druhasnyja sankcyi suprać zamiežnych finansavych ustanoŭ, jakija i dalej buduć padtrymlivać dziejnaść Irana», — zajaŭlaje amierykanski Minfin.

Kamientary da artykuła