U internecie paprasili dapamohi francuzskaj kaviarni ŭ Minsku — u vyniku raskupili ŭsio, navat kruasany pa 8,5 rubloŭ
Dniami ŭ Threads zaklikali padtrymać kaviarniu Café Bonjour, jakaja moža zakrycca praź finansavyja prablemy. A siońnia ŭ akaŭncie kaviarni napisali pra nastupstvy taho zakliku — akazałasia, ciapier jana nie daje rady z płyńniu naviedvalnikaŭ.
Fota: skryn ź videa cafe.bonjour / Instagram
Post pra kaviarniu francuza Siebaśćiana źjaviŭsia ŭ Threads 11 sakavika. Minčanka zaklikała ratavać kaviarniu:
«Heta miłaja kaviarnia francuza Siebaśćiana pad nazvaj Bonjour. Jon amal hod sprabuje praisnavać, ale kaža, što ciapier ledź trymajecca. Kali łaska, padtrymajcie chłopcaŭ, u ich vielmi smačnyja kruasany, kava i panakota!»
Post minčanki nabraŭ amal 17 tysiač łajkaŭ, a taksama sotni kamientaroŭ. Mierkavańni ludziej padzialalisia: adnyja zaklikali da salidarnaści, druhija aburalisia zavysokimi cenami. Usio ž mindalny kruasan za 8,5 rubloŭ i šakaładnaja bułačka za 9 rubloŭ — ceny, vyšejšyja za siarednija.
Fota: Jandeks Mapy
Fota: Jandeks Mapy
12 sakavika ŭłaśniki kaviarni padziakavali za padtrymku, a 13‑ha namiaknuli — biełaruskaja salidarnaść akazałasia takoj mocnaj, što davać joj rady niaprosta:
«Dziakuj za vašu nievierahodnuju cikavaść da Café Bonjour. Z učarašniaha dnia vy praktyčna całkam raskupili ŭsie našy zapasy, i ciapier my pracujem u vielmi napružanym režymie. Kali možacie, pastarajciesia nie prychodzić u nadta vialikaj kolkaści siońnia ŭdzień i ŭ hetyja vychadnyja, kab my mahli dobra absłužyć usich».
Fota: Jandeks Mapy
Fota: Jandeks Mapy
Kamientatary pastavilisia da zakliku siadzieć doma z humaram — maŭlaŭ, vyznačyciesia, patrebnyja vam klijenty ci nie.
Čytajcie taksama:
Biełarusy ŭzialisia ratavać francuzskuju kaviarniu ŭ centry Minska
Ivulin zrabiŭ tatu ŭ pamiać pra Miełkaziorava — voś jaki sens staić za imi
Viadučy ANT, jaki prasłaviŭsia miemam pra asu ŭ kadry, raskazaŭ, što było paśla taho videa