Fica hatovy zamianić Orbana ŭ błakavańni 90 miljardaŭ jeŭra dla Ukrainy, kali toj prajhraje vybary

Premjer-ministr Słavakii Robiert Fica zajaviŭ, što jaho kraina moža zabłakavać kredyt Jeŭrasajuza dla Ukrainy sumaj 90 miljardaŭ jeŭra. Pavodle jaho słoŭ, heta moža adbycca, kali na vybarach u Vienhryi pieramoža apazicyja i partyja Viktara Orbana «Fides» stracić uładu, piša «Jeŭrapiejskaja praŭda».

Premjer-ministry Vienhryi i Słavakii Viktar Orban i Robiert Fica. Fota: AP Photo / Denes Erdos

Fica paviedamiŭ, što płanuje abmierkavać hetaje pytańnie padčas sustrečy z kiraŭnicaj Jeŭrapiejskaj kamisii Ursułaj fon der Lajen. Akramia taho, jon choča zakranuć temu pracy naftapravoda «Družba». Premjer adznačyŭ, što Słavakija hatovaja dapamahčy ŭ vypadku nieabchodnaści ramontu abo inšych techničnych rabot na ŭkrainskim adcinku trubapravoda.

Jon taksama padkreśliŭ, što ciapier kredyt Jeŭrasajuza dla Ukrainy faktyčna zastajecca zabłakavanym.

Pavodle jaho mierkavańnia, ukrainski bok raźličvaje adnavić pastaŭki nafty praz paŭtara miesiaca — paśla vybaraŭ u Vienhryi, spadziejučysia na pieramohu apazicyi. U takim vypadku, jak namiaknuŭ Fica, Słavakija moža zaniać miesca Vienhryi i praciahnuć błakavańnie.

Premjer Słavakii ličyć, što spynieńnie hetaha finansavańnia moža stać instrumientam cisku, kab damahčysia adnaŭleńnia pastavak nafty. Jon dadaŭ, što ciapier dalejšyja rašeńni zaležać ad Jeŭrapiejskaha Sajuza.

Fica paprasiŭ sustreču z kiraŭnicaj Jeŭrakamisii Ursułaj fon der Lajen, i jana pavinna adbycca najbližejšym časam. Akramia taho, jon choča ŭzhadnić pazicyju Jeŭrakamisii adnosna naftapravoda «Družba» pierad sustrečaj z prezidentam Ukrainy Uładzimiram Zialenskim.

Kamientary da artykuła