U Minsku žančyna vykinuła ź dziaviataha paviercha čychuachua svajho kachanka

U Minsku vynieśli prysud 31‑hadovaj žančynie, jakuju pryznali vinavataj u žorstkim abychodžańni z žyviołaj i chulihanstvie, paviedamlaje ahienctva «Minsk-Naviny».

Zdymak ilustracyjny. Fota: freepik.com

Incydent adbyŭsia ŭviečary 12 kastryčnika 2025 hoda. Mužčyna viarnuŭsia z pracy ŭ internat, dzie žyŭ razam z maci. Jana ŭ toj čas znachodziłasia ŭ vioscy. U pakoi jaho čakała dziaŭčyna, ź jakoj jon sustrakaŭsia kala hoda.

Na praciahu dnia jana nieadnarazova telefanavała jamu, pravakavała svarki i pavodziła siabie ahresiŭna. U niejki momant jana navat pryhraziła vykinuć z bałkona jaho sabaku — čychuachua.

Chłopiec nie ŭspryniaŭ pahrozy surjozna, bo dziaŭčyna była pjanaja. Adnak kali jon zajšoŭ u pakoj, sabaka jaho nie sustreŭ. Pošuki ničoha nie dali, a dziaŭčyna z naśmieškaj spytałasia, ci nie złaviŭ jon žyviolinu. Tady stała zrazumieła, što sabaku vykinuli ź dziaviataha paviercha.

Paśla hetaha žančyna pačała vykidać z akna rečy, jakija naležali chłopcu i jaho maci. Uzrušany mužčyna patelefanavaŭ maci i paprasiŭ vyklikać milicyju. Paźniej vachciorka internata paćvierdziła, što sabaka zahinuŭ.

U sudzie žančyna całkam pryznała svaju vinu i raskajałasia, adnak nie zmahła rastłumačyć matyvy svajho ŭčynku. Sud pryznaŭ jaje vinavataj u chulihanstvie i žorstkim abychodžańni z žyviołaj.

Žančynie pryznačyli paŭtara hoda abmiežavańnia voli biez nakiravańnia ŭ papraŭčuju ŭstanovu («chatniaja chimija»), abaviazali prajści prymusovaje lačeńnie ad chraničnaha ałkahalizmu i vypłacić 500 rubloŭ u jakaści kampiensacyi maralnaj škody.

Kamientary da artykuła