Iłan Mask viartajecca ŭ palityku

Amierykanski miljarder Iłan Mask aktyvizavaŭ svaju palityčnuju dziejnaść padčas padrychtoŭki da pramiežkavych vybaraŭ u Kanhres ZŠA ŭ listapadzie 2026 hoda, paviedamlaje The Wall Street Journal.

Iłan Mask. Fota: Beata Zawrzel / NurPhoto via Getty Images

Mask znoŭ pačaŭ rabić bujnyja achviaravańni respublikancam i adnaŭlaje adnosiny z prezidentam ZŠA Donaldam Trampam. Z pačatku hoda jon užo nakiravaŭ $10 miljonaŭ na padtrymku respublikanskaha kandydata ŭ sienatary ad Kientuki Niejta Morysa. Stratehiju Maska kaardynuje jahony palittechnołah Krys Janh: kamanda viadzie pieramovy z padradčykami pa ličbavych kampanijach i padrychtoŭcy ahitacyi, rychtujučysia da mahčymaj šyrokaj vybarčaj kampanii.

Kančatkovy farmat udziełu Maska ŭ vybarach jašče nie vyznačany. Jon moža być jak u vyhladzie finansavańnia praz America PAC — kamitet padtrymki vybarčaj kampanii Trampa ŭ 2024 hodzie, tak i praz unioski ŭ inšyja kamitety ci vybarčyja honki asobnych kandydataŭ. Asnoŭnaja meta — mabilizacyja prychilnikaŭ Trampa, jakija zvyčajna aktyŭna hałasujuć tolki na prezidenckich vybarach.

U 2024 hodzie Mask vydatkavaŭ amal $300 miljonaŭ na padtrymku Trampa i respublikancaŭ, staŭšy najbolš viadomym palityčnym dabračyncam u ZŠA. Adnak z červienia 2025 hoda jaho achviaravańni skłali tolki $42 miljony.

Skaračeńnie dapamohi respublikancam adbyłosia paśla kanfliktu Maska z Trampam u červieni minułaha hoda. Mask krytykavaŭ trampaŭski «vialiki i cudoŭny zakon ab vydatkach i padatkach», nazyvajučy jaho «ahidnaj hniusnaściu», a Tramp u adkaz pahražaŭ skaračeńniem dziaržaŭnych kantraktaŭ i navat departacyjaj. Paśla hetaha Mask razhladaŭ mahčymaść stvareńnia ŭłasnaj palityčnaj partyi, ale admoviŭsia ad hetaj idei pad upłyvam vice-prezidenta Džej Dzi Vensa.

Pieršaje publičnaje ŭzajemadziejańnie Trampa i Maska paśla toj svarki adbyłosia ŭ vieraśni na pachavańni zabitaha kansiervatyŭnaha aktyvista Čarli Kirka. Paźniej, u listapadzie, Mask prysutničaŭ na viačery Trampa padčas vizitu ŭ ZŠA saudaŭskaha prynca Muchamieda bien Sałmana.

Kamientary da artykuła