Biełaruski bramnik vyjšaŭ hulać u matčy NCHŁ i prapuściŭ try šajby paśla troch kidkoŭ
Biełaruski hałkipier chakiejnaha kłuba «Fiładelfija Fłajerz» Alaksiej Kołasaŭ strašenna niaŭdała pačaŭ matč rehularnaha čempijanatu NCHŁ suprać kłuba «Ńju-Jork Rejndžers». Jon vyjšaŭ na lod u startavym składzie, ale ŭžo da dziaviataj chviliny pieršaha pieryjadu prapuściŭ try šajby, prytym paśla ŭsich kidkoŭ supiernika, što lacieli ŭ jahonyja varoty.
Alaksiej Kołasaŭ. Fota: phantomshockey.com
Pry hetym usie try šajby ŭlacieli ŭ varoty Kołasava na praciahu ŭsiaho 80 siekundaŭ. Nie dziŭna, što paśla takoha pačatku trenierski štab «Fłajerz» pryniaŭ rašeńnie zamianić biełarusa ŭ varotach — na lod vyjšaŭ švied Samuel Ersan.
Na momant zamieny lik byŭ 3:1 na karyść «Rejndžers». Sustreča prachodzić u Fiładelfii na arenie «Uełs Farha-centr».
Kołasaŭ staŭ asnoŭnym hałkipieram kamandy z-za traŭmy čecha Daniela Vładarža. U papiarednim matčy suprać «Pitsburha» jon źjaviŭsia na lodzie pa chodzie hulni i adbiŭ 13 z 16 kidkoŭ.
Da hetaha matča ŭ biahučym siezonie NCHŁ biełaruski varatar zhulaŭ u troch sustrečach, nie zdabyŭ nivodnaj pieramohi, mieŭ kaeficyjent nadziejnaści 2,69 i pracent adbitych kidkoŭ 88,6. U Amierykanskaj chakiejnaj lizie (ACHŁ) u jaho aktyvie 19 matčaŭ, 9 pieramoh, kaeficyjent nadziejnaści 2,54, pracent adbitych kidkoŭ 90,8 i dva «suchija» matčy.
Čytajcie taksama:
Biełaruski abaronca źmianiŭ kłub u NCHŁ
20‑hadovy biełaruski forvard padpisaŭ kantrakt navička z kłubam NCHŁ
19‑hadovy biełarus debiutavaŭ u Nacyjanalnaj chakiejnaj lizie