U Vieniesuele abjavili pra vyzvaleńnie vialikaj kolkaści palitźniavolenych

Ułady Vieniesueły abiacajuć vyzvalić «značnuju kolkaść» palitźniavolenych. Pra heta paviedamiŭ śpikier Nacyjanalnaj asamblei krainy Chorchie Radryhies. Ź jahonych słoŭ, najbližejšyja niekalki hadzin płanujecca vyzvaleńnie jak vieniesuelskich, tak i zamiežnych hramadzian, paviedamlaje Reuters.

Fota: AP Photo/Ariana Cubillos

Chorchie Radryhies adznačyŭ, što hetaja miera, jakuju nieadnarazova patrabavała apazicyja, źjaŭlajecca aktam miru. Jon taksama padkreśliŭ, što rašeńnie prymajecca adnabakova i biez uzhadnieńnia ź inšymi bakami.

«Balivaryjski ŭrad sumiesna ź dziaržaŭnymi ŭstanovami pryniaŭ pastanovu vyzvalić značnuju kolkaść vieniesuelskich i zamiežnych hramadzian, i zaraz hety praces užo adbyvajecca», — skazaŭ Radryhies, jaki, miž inšym, brat ciapierašniaj vykanaŭcy abaviazkaŭ prezidenta Vieniesueły Dełsi Radryhies.

Raniej Dełsi Radryhies zajmała pasadu vice-prezidentki i była pryznačanaja vykonvać abaviazki prezidenta paśla taho, jak ZŠA pazbavili ŭłady Nikałasa Madura. Amierykanskaja administracyja ciapier supracoŭničaje ź joj.

Pakul dakładna nieviadoma, kaho mienavita vyzvalać, ale Ministerstva zamiežnych spraŭ Ispanii ŭžo paviedamiła, što siarod vyzvalenych buduć ispanskija hramadzianie. Kiraŭnik MZS Ispanii Chase Manuel Albares nazvaŭ heta «vielmi pazityŭnym krokam» z boku vieniesuelskich uładaŭ.

Pavodle źviestak pravaabaroncaŭ, zaraz u Vieniesuele ad 800 da 900 palityčnych źniavolenych.

Kamientary da artykuła