Mierc paraŭnaŭ Pucina z Hitleram, pravioŭ paraleli z 1938 hodam i skazaŭ, što budzie rabić Jeŭropa

«Kali Ukraina padzie, jon nie spynicca», — papiaredžvaje kancler Hiermanii.

Uładzimir Pucin. Fota: Contributor / Getty Images 

Vystupajučy 13 śniežnia na partyjnaj kanfierencyi svajho aljansu CHDS/CHSS, Frydrych Mierc nazvaŭ adnaŭleńnie kankurentazdolnaści i abaranazdolnaści Hiermanii hałoŭnymi pryjarytetami svajho ŭrada, abhruntavaŭšy heta niebiaśpiekaj z boku Rasii.

Mierc padkreśliŭ, što vajna Rasii — heta nie łakalny kanflikt, jaki adbyvajecca niedzie daloka; na jaho dumku, heta adkryty vyklik usioj zachodniaj cyvilizacyi:

«Minimum z 24 lutaha 2022 hoda my viedajem, što ŭsio toje, da čaho my tut pryzvyčailisia, bolš nie źjaŭlajecca niečym samo saboj zrazumiełym. U Jeŭropie znoŭ vajna. I hetaja vajna nie niedzie tam daloka — za dźvie hadziny lotu, va Ukrainie. Heta štodzionnaja ataka na ŭsiu Jeŭropu.

Terytaryjalna — suprać Ukrainy, ale va ŭsich adnosinach taksama suprać Jeŭrapiejskaha sajuza, suprać zhurtavanaści ŭ Jeŭropie, suprać našych sietak pieradačy danych, suprać našaj svabody, suprać našaj infarmacyjnaj svabody. Tak, my nie ŭ stanie vajny, ale my bolš nie žyviom i prosta ŭ miry».

«Darečy, 24 lutaha 2022 nie byŭ pieršym dniom. Nasamreč, užo maj 2014 hoda byŭ tym dniom, kali my pavinny byli heta zrazumieć», — zaŭvažyŭ Mierc i nahadaŭ, što ŭ toj čas mnohija palityki bajalisia dziejničać rašuča, azirajučysia na 1914 hod, kab vypadkova nie spravakavać suśvietnuju vajnu.

Na pohlad lidara CHDS, hetaja anałohija akazałasia fundamientalna pamyłkovaj.

Bolš dakładnaj histaryčnaj anałohijaj byŭ by 1938 hod: Miunchienskaje pahadnieńnie, pavodle jakoha nacysckaja Hiermanija atrymała čechasłavackija Sudety. Jaho zaklučyli z Hitleram premjer-ministry Vialikabrytanii Čembierlen i Francyi Daładźje.

«Histaryčnyja anałohii zaŭsiody treba ŭsprymać z aściarožnaściu. Ale vysnova z hetaha — mierkavańnie, što treba praduchilić cichaje i nieprykmietnaje ŭpaŭzańnie ŭ kanflikt, jak u 1914 hodzie, — prynamsi, azirajučysia nazad, akazałasia pryncypova pamyłkovaj histaryčnaj anałohijaj.

Było b, mabyć, bolš pravilna ŭziać 1938 hod u jakaści histaryčnaj anałohii. Nasamreč heta była taja samaja schiema, jakuju my pavinny byli raspaznać jašče ŭ 2014 hodzie».

Palityk pravioŭ naŭprostavuju paralel pamiž apietytami Hitlera i Pucina, adznačyŭšy, što sproby zamireńnia ahresara terytoryjami nie pracujuć. Jon pieraściaroh ad dumak, što Rasija spynicca na Ukrainie:

«Kali Ukraina padzie, jon nie spynicca. Hetak ža, jak Sudeckaj vobłaści było niedastatkova [Hitleru] u 1938 hodzie. I toj, chto siońnia dumaje, što na hetym usio skončyłasia, niachaj uvažliva ŭčytvajecca ŭ jaho stratehii, dakumienty, pramovy i vystupy.

Nie, darahija siabry, tut havorka idzie pra karennaje źmianieńnie miežaŭ u Jeŭropie, adnaŭleńnie staroha Savieckaha Sajuza, u miežach staroha Savieckaha Sajuza, ź vialikaj pahrozaj, u tym liku vajennaj pahrozaj dla krain, jakija raniej naležali da hetaj impieryi», — davodzić Mierc.

Kab paźbiehnuć katastrofy, Mierc prapanuje płan z čatyroch krokaŭ, jaki faktyčna aznačaje viartańnie da palityki vajennaha strymlivańnia.

Pieršy i niaźmienny punkt — heta dapamoha Ukrainie. Druhi — zabieśpiačeńnie zhurtavanaści ŭnutry Jeŭrapiejskaha sajuza. Pryčym Mierc asobna padkreśliŭ nieabchodnaść znoŭ uklučyć u hetyja ahulnyja stratehičnyja kirunki i Vialikabrytaniju. Trecim krokam jon nazvaŭ padtrymańnie aljansu NATA «tak doŭha, jak heta mahčyma», bo mienavita zachodni aljans zastajecca fundamientam biaśpieki. I, narešcie, čaćviorty punkt — heta masiŭnyja inviestycyi va ŭłasnuju abaranazdolnaść Hiermanii.

«I kali łaska, niachaj nichto nie kaža, što heta staraja i sastarełaja kancepcyja. <…> My majem vialikaje ščaście žyć u miry. I my nie pavinny ryzykavać hetym. I ja nie hatovy ryzykavać hetym taksama».

Kamientary da artykuła